SQO-da atbegiler áýleti báıge baptaýdy urpaqtan-urpaqqa jalǵap keledi
PETROPAVL. KAZINFORM — Soltústik Qazaqstan oblysy Ýálıhanov aýdany Kishkenekól aýylyndaǵy Mahatovtar otbasynyń turmysy jylqymen bite qaınasqan. Shańyraqtaǵy ár bala — shabandoz, al ulttyq oıyn kókpar — saltqa, báıge — ómir mánine aınalǵan.
Tańǵy saǵat segizden bul otbasynda qyzý tirlik bastalady. Óıtkeni qoradaǵy jaratylyp turǵan sáıgúlikter erekshe kútimdi qajet etedi.
Eńbekti súıetin áýlet bul kásipti birneshe býynnan beri jalǵastyryp keledi.
— Tańerteń jylqylarǵa jem-sý, shóbin beremiz. Ratsıonynda dárýmenderdiń bolýy mańyzdy. Sábizdi súıip jeıdi. Túske qaraı shyǵaryp, jýamyz, quıryq-jalyn taraımyz. Kók shópke shaldyrtamyz. Al ystyq qaıtysymen minip, jattyǵamyz. Qysta kútimi basqasha, semirtip, kóktem shyǵa at sporty maýsymyna daıyndaımyz, — deıdi Ádilhan Mahatov.
Ádilhan — shańyraqtaǵy ekinshi ul. Ol búginde atbegilik pen shabandozdyqty qatar alyp júr.
— Brasletti qulyn kezinen baptap, ósirip jatyrmyn. Eki jasynan báıgege qatystyryp, úmitimdi aqtady, únemi 1-2 oryn alyp júrdi. Endi kókparǵa beıimdeýdi bastadym. Qazir, Alla jazsa, tórtke keldi, byltyr Shymkentke bardym osy aıǵyrmen. Qazir Almatyǵa barýǵa daıyndalyp jatyrmyn. Jylqy men adamnyń minezi uqsas, keıde osqyrynyp, kóńil-kúıi bolmaı turady, oǵan da qaraý kerek. Al, jalpy, bul tulparym kópqyrly deýge bolady. Kókparda shabýylǵa da, qorǵanysta da paıdalanýǵa bolady, — deıdi Ádilhan.
Shyńǵyshannyń jasy 14-te. Bes jasynan at jalyn tartyp mingen jasóspirimniń túrli jarystarǵa qatysyp júrgenine bıyl altynshy jyl.
— Bul — Kókmonshaq, rysak pen anglo-arabtyń tuqymy bar munda. Ol óte júırik, ári qoryqpaıdy. Kókparda serke alsań jetkizbeıtin aıǵyr. Minezi tentekteý, bıleıdi de. Eki jasynda Petropavlda ótken alamanda ekinshi oryn aldy. Meniń eń birinshi báıgem oblys ortalyǵynda boldy. Sol joly 4-shi oryn aldym. Eń úlken báıgem Astanada boldy, onda úshinshi oryn aldym «Juldyz» degen sáıgúlikpen, — deıdi Shyńǵyshan Mahatov.
Mahatovtar otbasynyń jarystarǵa baptap otyrǵan jıyrma shaqty sáıgúligi bar.
— Eki-úsh atym jarystan keldi, eki-úsh kún ǵana boldy. Ulttyq sporttan Aqqaıyń aýdanynda oblystyq spartakıada bolyp, bizdiń komanda bas júldeni jeńip aldy. «Alaýqasqa» degen jylqyny qysta ǵana satyp aldy, ony da kókparǵa qosamyn. Endi syrttan satyp alýdy toqtatamyn. Ózim qazir mine qoımaımyn. Úlken balam minedi. Búginde óz qulyndarymdy alyp jatyrmyn, aıǵyrlarym taza qandy, aǵylshyn tuqymdy, — deıdi otaǵasy.
Ramazan Mahatov — oblystyń kókpardan aǵa jattyqtyrýshysy.
Qajymuqan atyndaǵy ulttyq sport túrlerinen oblystyq balalar men jasóspirimder sport mektebiniń aýdandyq fılıalynda balalardy ulttyq oıynnyń qyr-syryna jattyqtyrady.
— Kókpar tek sport emes, rýh synǵa túsetin sát. Tizgin ustaǵan bala — erteń jaýapkershilik arqalaýǵa daıyn azamat. Meniń tobymda qazir 18 bala bar. Іshinde men dep berilip, kókpar shabatyn 5-6 ǵana bala bar. Kókpar degen óte qaýipti sport qoı, ata-analary kóbinese qorqady. Balalardy alysqa jibergileri kelmeıdi. Basqa sportpen keıbireýler salystyrady bul kókpardy. Fýtboldy, voleıboldy alyńyz, sportshy sómkesin aldy da ketti. Biz jarysqa barsaq sómkemiz bar, balalardyń kıimi, onyń er-saımany bar jáne atty súıreımiz ǵoı. Shymkentke, Qyzylordaǵa deıin úsh-tórt táýlik júrip barǵan kezder boldy. Jekemenshik attarymyz jolda aýyryp, kómip ketken kezderimiz de boldy. Óte qıyn sport. Sózdiń shyny kerek, kishkene qalyp kelemiz. Biz ortada júrmiz qazir. Al negizi tórttikke, bestikke kirgenbiz. Bizdiń jaqta qoldaý degen az ǵoı, basqa ońtústik óńirlerge qaraǵanda, onda demeýshiler kóp. Attar óte qymbat. Kishkene qoldap jiberse, tyrmysamyz, kóbine shamamyz kelmeı jatady qarajat jaǵynan, — deıdi Ramazan Mahatov.
Úıdiń kenjesi — Temirlan, tórt jasqa toldy. Aǵalary atqa qonǵanda búldirshin velosıpedin minip shyǵady.
Ata kásipti ulyqtap, ulttyń bolmysqa adal bolý — ár qazaqtyń boryshy. Úıelmen tek at baptap, kókpar shappaıdy. Bıe saýyp, tútin ıisi sińgen ulttyq taǵam — qymyzdy da daıyndaıdy.
— Qazir balalarǵa ulttyq tárbıe aýadaı qajet. Alla bergen tórt ulymyz bar. Eresekteri kómektesedi, kúbi pisedi, bıe saýady. Sıyr saýamyz bárimiz. Іrimshik, qospa, maı daıyndap, satamyz. Qurt satamyz. Bizdiń burynǵy ulttyq dástúrlerimiz, bárin saqtaımyz, bárin qolmen jasaımyz. Dastarhandaǵy taǵam — bári ózimizdiki — úıdiki. Qus ustaımyz, jumyrtqa ózimizdiki. Qaz ustaımyz, baý-baqsha egemiz. Biz bárin otbasy bolyp birge isteımiz. Bala-shaǵam kómektesedi, joldasym kómektesedi. Bárimiz birigip isteımiz. Bóliný joq, — deıdi otanasy Gúlnar Mahatova.
Buǵan deıin tserebraldy sal dıagnozy bolsa da, qoǵamda belsendi azamattyq ustanymy bar petropavldyq Aqjan Kárim týraly jazǵan edik.
