SQO-da at jarysy maýsymy ashyldy
PETROPAVL. QazAqparat – Soltústik Qazaqstan oblysynda eki jylǵa jýyq úzilisten keıin «Qulager» ıppodromynda jazǵy at jarysy maýsymy ashylyp, oblystyq at sporty jarystary ótti, dep habarlaıdy QazAqparat tilshisi.
SQO dene shynyqtyrý jáne sport basqarmasy baspasóz qyzmetiniń málimetinshe, pandemııaǵa baılanysty óńirde eki jylǵa jýyq at sporty jarystary ótkizilgen joq. Sol sebepti at sportynyń ashylýyn kópshilik asyǵa kútken edi. Kórermender burynnan belgili shabandozdar men olardyń attaryn erekshe qoshemetpen qarsy aldy.
Jeńiske úmitkerler qatarynda aǵaıyndy Abdývalı men Avaz Nurmetovtar, Artem men Evgenıı Chıbısovtar, ákesi men qyzy Ýlfat pen Rýmııa Ýsmanovtar boldy.
Desek te, 1600 metr qashyqtyqta Mamlıýt aýdanynyń shabandozy Andreı Kasılov úsh jasar Pılıgrım tulparymen aldyna jan salmady.
1800 metrlik ushqyr báıgede Aqjar aýdanynyń atynan shyqqan Demısh atty sáıgúlik kósh bastady. Aǵylshyndyq taza qandy tulparmen óner kórsetken Dmıtrıı Volkov kóptegen jarystardyń jeńimpazy. Onyń Demıshi márede Rýmııa Ýsmanovanyń ataqty júırigi ıÝsýpty basyp ozdy.
Aleksandr Lıtvınov tórt jasar Peleponezde sáıgúligimen 1600 metr qashyqtyqta Chýdesnoı jáne Terpelıvyı attarymen shyqqan aǵaıyndy Avaz ben Abdýalı Nurmetovterdi basyp ozdy.
7000 metrlik jorǵa jarysta márege birinshi bolyp Aleksandr Kornılov tizgindegen Rysak jetti.
Alaman báıge - 12 000 metr qashyqtyqta 12 at jarysty, biraq márege tek úsh tulpar ǵana jete aldy. Nátıjesinde bas júlde Tarlan atty aǵylshyndyq taza tuqymdy sáıgúligimen birinshi kelgen Aqjar aýdanynyń shabandozy Damır Danııarǵa berildi.
