SQO-da at sporty maýsymynyń jabylýy ótti
PETROPAVL. QazAqparat – Soltústik Qazaqstan oblysy Qyzyljar aýdanyndaǵy «Qulager» ıppodromynda at sporty maýsymynyń jabylýyna arnalǵan mereke ótti, dep habarlaıdy QazAqparat tilshisi.
SQO Dene shynyqtyrý jáne sport basqarmasy baspasóz qyzmetiniń málimetinshe, merekege oraı ıppodromda qonaqtar sáıgúlikterdiń túrli qashyqtyqqa jarysyn, jorǵa jarysty jáne 15 shaqyrymǵa sozylǵan alaman báıgeni tamashalaı aldy.
Óńirde ulttyq sport túrlerin, sonyń ishinde at sportyn damytý jaqsy jolǵa qoıylǵan. Oblysta birneshe balalar men jasóspirimder sport mektepteri, kásibı klýbtar jumys isteıdi. Jýyrda qazaq kúresinen qurylǵan «Qyzyljar arlandary» klýby el boıynsha úzdik úshtiktiń qatarynda. «Tulpar» klýbynyń shabandozdary respýblıkalyq, halyqaralyq týrnırlerde júldeli oryndar alyp júr. Jaqynda Aqtóbede ótken respýblıkalyq ulttyq sport túrleri festıvalinde soltústikqazaqstandyqtar alaman báıgede bas júldeni jeńip aldy. Buǵan deıin týrnır kestesiniń sońynda júretin qurama bıyl jalpy esepte 17 komandanyń ishinen 5 orynǵa turaqtady.
Bul osy jylǵy sońǵy jarys bolǵandyqtan shabandozdar birneshe qashyqtyqty eńserip, jaqsy nátıje kórsetýi kerek. 1,6 shaqyrymdyq maıda jarysta Áset Bekjanov Harıkeın Prıntsess tulparymen birinshi keldi. 2,4 shaqyrymda taǵy da Áset Latraıa atty sáıgúlikpen aldyna jan salmady. 7 shaqyrymdyq jorǵa jarysta shabandoz Dmıtrıı Volkov Pan atty jelisti jylqysymen alǵa shyqty.
Kórermender asyǵa kútken alaman báıge tartysty ótti. Muhamedálı Nıkıforov «Aıslıng» atty tulparymen birinshi keldi.
