SQO-da «Asyl mura» ǵylymı ortalyǵynyń 20 jyldyǵyna arnalyp memorıaldy taqta ashyldy
PETROPAVL. QazAqparat – Soltústik Qazaqstan oblysynda 70-ten astam kitap pen kóptegen ǵylymı maqalalar men ocherkterdi jaryqqa shyǵarǵan «Asyl mura» ǵylymı ortalyǵynyń 20 jyldyǵyna oraı memorıaldy taqta ashyldy, dep habarlaıdy QazAqparat tilshisi.
«Asyl mura» ortalyǵy Petropavlda 2001 jyly 1 aqpanda quryldy. Ortalyq qyzmetkerleri oblystyq, respýblıkalyq jáne Reseı arhıvterinde qoljazbalardy, muraǵat materıaldaryn zerdelep, kónekóz qarııalarmen áńgimelesip, elge eńbegi sińgen, biraq, solaqaı saıasattyń saldarynan esimderi umyt bolǵan, atalmaı kelgen kóptegen tulǵalardy halyqqa tanystyrdy. 20 jyldyń ishinde naqty derekkózderge negizdelgen, 70-ten astam kitap pen kóptegen ǵylymı maqalalar men ocherkterdi jaryqqa shyqty.
«Qojabergen jyraý, Segiz seri, Toqsan bı babalarymyzdyń ómirbaıany men shyǵarmashylyǵy týraly alǵash ret osy «Asyl mura» qaıratkerleriniń izdenýiniń arqasynda estidik. Ortalyq baspasózderde Qojabergen jyraý men Segiz serilerge baılanysty aıtyla bastaǵan jańsaq pikirlerge de birinshi bolyp toqtaý salǵan osy «Asyl mura» qyzmetkerleri bolatyn», - deıdi SQO ishki saıasat basqarmasynyń basshysy Kemel Ospanov.
Ortalyq qyzmetkerleri, oqý-aǵartý salasynyń ardagerleri Ǵalym Qadyralın, Qaırolla Muqanov jáne Sotsıal Jumabaev Petropavldaǵy oblystyq ólketaný murajaıynda otyryp, eńbektendi. Shal aqyn, Toqsan bı, Baımaǵambet Іztolın, Abylaı Ramazanov, Jumaǵalı Tileýlın, Úkili Ybyraı Sandybaev, Kákimbek Salyqov, Shota-Aman Ýálıhanov, Jylǵara Baıtoqın jáne t.b. týraly qazaq jáne orys tilderinde jaryq kórgen kóptegen maqalalar, ocherkter men kitaptar qoǵamda úlken rezonans týdyrdy. Olar ulttyq tarıhty, halyqtyq dástúrler men mádenıetti qaıta qurý isine úlken úles qosty. Ortalyq qyzmetkerleriniń ólkeniń tarıhyn, etnografııasy men mádenıetin zertteýge qosqan úlesteri eskerilip, «Asyl mura» ortalyǵynyń qurylǵanyna 20 jyl tolýyna oraı ortalyq ornalasqan oblystyq tarıhı-ólketaný mýzeıiniń ǵımaratyna memorıaldyq taqta ornatyldy.
