SQO-da astyq qabyldaý pýnktinde órt shyǵyp, 748 tonna un janyp ketti
PETROPAVL. QazAqparat – Soltústik Qazaqstan oblysyndaǵy Kondratovka eldi mekeninde astyq qabyldaý pýnktinde órt shyǵyp, qapqa salynǵan 748 tonna un, 20 tonna kebek jáne aıyrly júk tıegish janyp ketti, dep habarlaıdy QazAqparat tilshisi.
SQO tótenshe jaǵdaılar departamenti baspasóz qyzmetiniń málimetinshe, 12 maýsym kúni saǵat 5.36 mınýt ketkende órt sóndirý qyzmetine Qyzyljar aýdanyndaǵy Kondratovka eldi mekenindegi astyq qabyldaý pýnkti aýmaǵynyń janyp jatqandyǵy jóninde habar túsedi.
Órt «Nur kompanııa Astyq LTD» JShS qoımalarynyń birinde shyqqan. Jalynmen kúreske Qyzyljar aýdanynyń jáne Petropavldyń mamandary men tehnıkasy jumyldyrylady. Alaıda olardyń oqıǵa ornyna jyldam jetýine joldyń nasharlyǵy kedergi bolǵan.
Órt sóndirýshiler jetkende sektsııalyq úlgidegi qoıma lapyldap janyp, qasyndaǵy qalǵan nysandarǵa taralý qaýpi bolǵan.
Jalyndy aýyzdyqtaýmen órt sóndirý qyzmetiniń 40 mamany jáne 11 tehnıka, sondaı-aq kásiporynnyń erikti órt sóndirý qurylymynyń 3 mamany men 1 tehnıka aınalysty. Órtti úsh jerden sóndirýge týra keldi. Joǵary temperatýra men kók tútin olardyń jumysyn qıyndata tústi. Tek tańǵy saǵat 10.07 mınýt ketkende ǵana órt tolyq sóndirildi.
Mamandardyń aıtýynsha, 1100 sharshy metr aýmaqtyń shatyry zaqymdandy. Qaptarǵa salynǵan 748 tonna un, 20 tonna kebek jáne aıyrly júk tıegish janyp ketti. Al jaqyn mańdaǵy qoımalar men dıirmen kesheniniń ǵımaraty aman qaldy.
Qaza tapqandar men zardap shekkender joq. Qazirgi tańda órttiń shyǵý sebebi jáne kelgen shyǵyn mólsheri anyqtalyp jatyr.
