SQO-da astyq qabyldaý oryndary oraq naýqanyna daıyndalyp jatyr

PETROPAVL. KAZINFORM — Soltústik Qazaqstan oblysynda eki aptadan keıin oraq naýqany bastalady. Qazirgi ýaqytta óńirdegi astyq qabyldaý kásiporyndary tekseristen ótip, bıylǵy bıdaıdy qabyldaýǵa ázirlenip jatyr.

Bıylǵy naýqanda jaýyn-shashynǵa baılanysty dán keptirgishterge suranys joǵary bolýy múmkin.

Desek te, mamandardyń aıtýynsha, oblys boıynsha astyq qabyldaý oryndary jetkilikti.

Syıymdylyǵy 3,2 mln tonna bolatyn 46 elevator bar. Sondaı-aq sońǵy jyldary sharýashylyqtar ózderiniń bıdaı keptirgishterin salyp jatyr.

Osyndaı qurylymdardy qosa eseptegende qazirgi ýaqytta óńir 6,9 mln tonna astyqty keptirip, saqtaı alady. 

«Oblys boıynsha astyq keptirgishterdiń sany 332-ge jetti, saǵatyna 10,6 myń tonnany óńdeı alady. Jalpy bir astyq keptirgishtiń ortasha ónimdiligi saǵatyna 32 tonna. Qazirgi ýaqytta oblystyń astyq qabyldaý kásiporyndary jańa bıdaıdy qabyldaýǵa daıyndyq jumystaryn júrgizip jatyr. Materıaldyq-tehnıkalyq bazany daıyndaý barysynda tehnologııalyq jabdyqtardy jóndep, tehnıkalyq qyzmet kórsetiledi. Avtomobıl jáne temir jol tarazylary, zerthanalyq jabdyqtar tekseriledi, qoıma jáne elevatordy tazartý jáne kemirgishterge qarsy hımııalyq óńdeý júrgiziledi, jańa ónim alý úshin keıbir astyq qabyldaý kásiporyndary ótken jylǵy astyqtan bosatyp jatyr», — deıdi SQO aýyl sharýashylyǵy jáne jer qatynastary basqarmasynyń baspasóz hatshysy Anastasııa Harlamova

Mamannyń aıtýynsha, qazirgi ýaqytta astyq qabyldaý kásiporyndary ortasha eseppen 80-85% daıyn tur.

Egin oraǵy bastalǵanǵa deıin, ıaǵnı 10-15 tamyzda barlyq elevatorlar bıdaıdy qabyldaýǵa daıyn bolady. 

Buǵan deıin dıqandarǵa egistikti sýarýǵa 5 mlrd tekshe metr sý berilgenin jazǵan edik.