SQO-da astyq býnkerine qulap, mert bolǵan áıelge qatysty sot úkimi shyqty
PETROPAVL. KAZINFORM – Byltyr Soltústik Qazaqstan oblysy Aqjar aýdanyndaǵy óndiris ornynda adam ólimine ákelgen oqıǵa eńbek qaýipsizdigi talaptarynyń buzylýy saldarynan bolǵan.
Aqjar aýdandyq soty «Talshyq Astyq LTD» JShS-niń eńbek qaýipsizdigi jáne eńbekti qorǵaý ınjeneri Qaırat Salyqovqa qatysty qylmystyq isti qarady. Ol QR Qylmystyq kodeksiniń 156-baby 3-bóligi - eńbek qaýipsizdigi erejelerin buzý saldarynan abaısyzda adam ólimine ákep soqtyrǵan áreket boıynsha aıyptalǵan.
Іs materıaldaryna sáıkes, byltyr 19 qarasha kúni kásiporyn jumysshysy Almagúl Sháripova Aqjar aýdany Talshyq aýylyndaǵy astyq keptirý kesheninde óndiristik býnkerlerde ólsheý jumystaryn júrgizgen.
Shamamen saǵat 15:35-te №95 jedel býnkeriniń janynan ótip bara jatqan kezde ol baqylaý lıýgine qulap ketken. Saldarynan áıel astyq astynda qalyp, oqıǵa ornynda kóz jumdy.
Arnaıy tergeý komıssııasynyń qorytyndysyna sáıkes, jazataıym oqıǵa tolyqtaı eńbek qyzmetimen baılanysty dep tanylyp, jumys berýshiniń kinási dáleldendi. Sot barysynda eńbek qaýipsizdigi ınjeneri Qaırat Salyqovtyń eńbek qaýipsizdigi talaptaryn tıisti deńgeıde oryndamaǵany anyqtaldy. ıAǵnı, jumysshy qulap ketken lıýktyń qaqpaǵy men qorǵanysh torynyń bir bekitkishi bolmaı, durys bekitilmegen. Osylaısha tehnıkalyq jabdyqtardyń jaı-kúıine baqylaý jetkiliksiz júrgizilgen. Jumysshyny jańa qyzmetke aýystyrǵannan keıin eńbek qaýipsizdigi boıynsha oqytý men bilimin tekserý uıymdastyrylmaǵan. Sondaı-aq óndiristegi qaýipsizdik talaptarynyń saqtalýyna tıisti qadaǵalaý jasalmaǵan.
Sotta aıyptalýshy óz kinásin tolyq moıyndap, Sháripova jańa jumysqa aýysqannan keıin onymen oqytý jumystaryn ótkizip úlgermegenin aıtty.
Jaza taǵaıyndaý kezinde sot Salyqovtyń kináni tolyq moıyndaýyn, shyn ókinýin, buryn sottalmaǵanyn jeńildetetin mán-jaı retinde qarap, eskerdi.
Sot úkimimen Qaırat Salyqov 2 jyl merzimge bas bostandyǵyn shekteý jazasyna kesildi jáne 3 jyl merzimge eńbek qaýipsizdigi jáne eńbekti qorǵaý salasyndaǵy qyzmetterdi atqarý quqyǵynan aıyryldy. Sonymen qatar, oǵan probatsııalyq baqylaý belgilendi. Budan bólek, saraptama júrgizýge ketken protsessýaldyq shyǵyndar, jábirlenýshilerdiń ótemaqy qoryna mindetti tólem óndirildi.
Úkim zańdy kúshine endi.
Esterińizge salaıyq, byltyr 34 jastaǵy áıel bıikten astyq saqtaý qoımasyna qulap ketip, oqıǵa ornynda kóz jumǵan edi.
