SQO-da «Astana - Volodarskoe» baǵytyndaǵy poıyz iske qosyldy
PETROPAVL. QazAqparat - Aıyrtaý aýdanynyń Saýmalkól aýyly jańa «Astana - Kókshetaý - Volodarskoe» elektr poıyzyn qarsy aldy, dep habarlaıdy QazAqparat tilshisi.
Óńirlik kommýnıkatsııalar qyzmetiniń aqparatyna qaraǵanda, bul «Volodarskoe» stansasynan ótetin alǵashqy elektr poıyzy bolmaq. Baǵdar ázirge aptasyna eki ret: juma jáne jeksenbi kúnderi júredi.
«Osy baǵdar aýdandy damytý úshin óte qajet edi. Bizdiń stansa úshinshi synypqa jatady, Pavlodar, Qostanaı, Qaraǵandy qalalaryna poıyzdar, tipti «Brest - Qaraǵandy» reısi de osy jerden ótedi. Stansanyń táýliktik jolaýshy aǵyny 50 adamdy quraıdy», - deıdi stanca basshysy Almas Kenjekeev.
Poıyz alty vagonnan quralǵan, eger jolaýshy sany artyp jatsa, taǵy da eki vagon qosýǵa bolady. Ár vagonda 376 oryn bar. Astanadan «Volodarskoe» stansasyna deıin poıyz 5 saǵat 35 mınýt júredi. Bılettiń baǵasy onyń klasyna qaraı: 1943 teńge, 1810 jáne 1504 teńge, al Kókshetaýdan «Volodarskoe» stansasyna deıin 775, 725, 599 teńge.
Jańa baǵdar Soltústik Qazaqstan oblysynyń ákimdigi men QR Investıtsııalar jáne damý mınıstrliginiń qoldaýymen iske qosylyp otyr.
