SQO-da astan ýlaný deregine qatysty medıtsınalyq komıssııa quryldy
PETROPAVL. KAZINFORM – Soltústik Qazaqstan oblysynda astan ýlanǵan otbasynyń eki múshesi jansaqtaý bóliminde jatyr.
Esterińizge salaıyq, buǵan deıin Qyzyljar aýdany Nadejka eldi mekeninde bir otbasynyń tamaqtan ýlanyp, saldarynan eki balanyń qaıtys bolǵanyn jazǵan edik.
Qaıtys bolǵan balalardyń atasy Sergeı Kovalenkonyń aıtýynsha, oqıǵa 13 maýsym kúni bolǵan. Otbasy músheleri keshki astan keıin kezekpen aýyra bastaǵan.
«Keshke tamaq iship, qusqan. Ózim kórgen joqpyn, biz bólek turamyz. Balam úıde joq. Polıtsııaǵa túsinikteme berýge qalaǵa ketti», - deıdi Sergeı Kovalenko.
SQO densaýlyq saqtaý basqarmasy astan ýlanǵan otbasyna qatysty jaǵdaıǵa túsinik berdi. Vedomstvo basshysynyń mindetin atqarýshy Raısa Qusaıynovanyń aıtýynsha, túngi saǵat 2.00 shamasynda otbasy Nadejka aýylynyń medbıkesine habarlasyp, úsh adamnyń – 1996 jylǵy áıel men 2017 jáne 2014 jylǵy eki balanyń qusyp jatqandyǵy týraly habarlaǵan. Medbıke medıtsınalyq kómek kórsetken. Tańǵy saǵat 8.00 shamasynda mekenjaıdan qaıta habarlasyp, kelgen medbıke sol jerde 2021 jylǵy balanyń qaıtys bolǵanyn tirkedi.
«Eki jedel járdem kóligimen anasy men balalary Petropavldaǵy medıtsınalyq mekemelerge jetkizildi. 2017 jyly týǵan qyz balanyń jaǵdaıy aýyr boldy, ol dereý reanımatsııaǵa jatqyzylyp, ókpeni jasandy jeldetý apparatyna qosyldy. Alaıda keshki saǵat 20.50-de 6 jasar qyz bala qaıtys boldy, - deıdi Raısa Qusaıynova.
28 jastaǵy áıel Petropavldaǵy ınfektsııalyq aýrýhanada, jansaqtaý bóliminde jatyr, jaǵdaıy azdap jaqsarǵanymen, áli de aýyr.
10 jastaǵy balanyń da jaǵdaıy turaqty aýyr. Úıdiń ıesi – er adam aýrýhanaǵa jatýdan bas tartqan.
«Qazirgi ýaqytta densaýlyq saqtaý basqarmasynda osy oqıǵaǵa qatysty komıssııa qurylǵan. Іstiń mán-jaıyn anyqtaıtyn bolamyz. Barlyq bıologııalyq materıal saraptamaǵa jiberildi. Ólimniń aldyn ala sebebi -taǵamdyq toksıkalyq ınfektsııa, ınfektsııalyq-toksıkalyq shok, mıdyń isinýi. Áıeldiń aıtýynsha, olar sol kúni pıtstsa, shujyq, dúken tushparasyn jep, kola ishken», - deıdi Raısa Qusaıynova.
Sondaı-aq SQO-da kún jylynǵaly kene shaqqan 350 adamnyń dárigerge qaralǵanyn jazǵan edik.
