SQO-da áskerı-tehnıkalyq mekteptiń túlekteri donor boldy

PETROPAVL. QazAqparat – Petropavldaǵy áskerı-tehnıkalyq mekteptiń túlekteri «Ómirge úmit syıla» aktsııasyna qatysyp, donor boldy, dep habarlaıdy QazAqparat tilshisi.

«Ómirge úmit syıla» qaıyrymdylyq aktsııasy byltyr naýryz aıynda bastaldy. Soltústik Qazaqstan oblysy Qorǵanys isteri departamenti baspasóz qyzmetiniń málimetinshe, vedomstvo qyzmetshileri ıgi iske turaqty qatysady. Áskerı-tehnıkalyq mekteptiń kýrsanttary jyl basynan on shaqty ret oblystyq qan ortalyǵyna kelip, donor boldy.

Medıtsınalyq irikteýden oıdaǵydaı ótken onnan astam shaqyrylýshynyń árqaısysy 450 ml kóleminde qan tapsyrdy.

«Adamdar qolynan kelgenshe jaqsy is istep, eń bolmaǵanda ózderiniń jaqyndaryna qol ushyn berýi tıis. Statıstıka boıynsha árbir úshinshi adam qan almastyrýǵa zárý bolady. Barshaǵa aıan, adamnyń aǵzasynda 5 lıtrge jýyq qan bar. Men búgin ózimniń 450 ml qanymdy berdim. Meniń qanym adamnyń ómirin qutqaryp qalýǵa kómektesedi dep úmittenemin», - dedi mektep tárbıelenýshisi Darhan Danııarov.

Mamandardyń aıtýynsha, qazirgi ýaqytta elimizdiń Qarýly kúshteriniń áskerı qyzmetshileri udaıy negizde Qazaqstandaǵy donorlyqty damytý isine úlesterin qosyp júr. Oblystyq qan quıý ortalyǵynda atap ótkendeı, sońǵy ýaqytta donorlardyń qatary artqan. Adamdar negizinen áleýmettik jaýapkershilikti sezinip qan tapsyrady eken.

Jastar bul joly oblystyq qan ortalyǵyna shamamen 10 lıtrdeı qan tapsyrdy.