SQO-da áskerı ınstıtýttyń ofıtseri para aldy degen kúdikke ilindi

PETROPAVL. QazAqparat – Soltústik Qazaqstan oblysynda QR Ulttyq ulany Áskerı ınstıtýtynyń ofıtseri qol astyndaǵy qyzmetkerden para aldy degen kúdikke ilindi, dep habarlaıdy QazAqparat tilshisi.

SQO Sybaılas jemqorlyqqa qarsy qyzmettiń málimetinshe, arnaıy jedel-izdestirý is-sharalarynyń nátıjesinde sybaılas jemqorlyq quqyq buzýshylyq jasaǵany úshin QR Ulttyq ulany Áskerı ınstıtýty batalonynyń komandıri áshkerelendi.

Ol áskerı ınstıtýt basshylyǵy tarapynan belgilegen tyıymǵa qaramastan, qaramaǵyndaǵy qyzmetkerden garnızon sheginen shyǵýǵa ruqsat bergeni úshin 30 myń teńge somasynda aqshalaı para aldy degen kúdikke ilindi. Ofıtserdiń zańsyz áreketi jaıynda Sybaılas jemqorlyq qyzmetke azamattardyń bireýi aryzdanǵan.

Kúdikti ustalyp, Petropavldaǵy ýaqytsha ustaý ızolıatoryna qamaldy.

Kúdiktige qatysty túpkilikti sheshimdi sot shyǵarady.