SQO-da áskerge shaqyrylǵan 760 adamǵa izdeý jarııalandy
Atalǵan aqparatty oblys ákimdiginiń májilisinde Qorǵanys isteri departamentiniń bastyǵy Almaz Tileýhanov jarııa etti.
«Ótken jyly bul kórsetkish 784 bolatyn. Іzdeý jarııalanǵandar sany aıtarlyqtaı tómendedi dep aıta almaımyz»,-dedi A.Tileýhanov.
Onyń sózinshe, elimizde áskerı qyzmetin óteýden bas tartqany úshin 5 aılyq eseptik kórsetkish kóleminde aıyppul tóleý jaýapkershiligi qarastyrylǵan. Bul degenińiz 12 myń teńgeden sál ǵana kóp. Reseıde mundaı áreket úshin qylmystyq jaýapkershilik qarastyrylǵan.
«Qylmystyq Kodekste arnaıy bap bar, alaıda ol jumys istemeıdi. Eger áskerge shaqyrylǵan azamat óz erkimen shaqyrtý bólimine keletin bolsa, is toqtatylady. Aqpan aıynyń sońynda biz bul máseleni mınıstrlik deńgeıinde talqyladyq. Qazir birqatar jobalar daıyndalyp jatyr»,-dedi departament bastyǵy.
Kóktemgi shaqyrtý maýsymyndaǵy taǵy bir másele medıtsınalyq komıssııalarda dárigerlerdiń jetispeýshiligimen baılanysty.
A.Tileýhanovtyń sózinshe, oblystyq medıtsınalyq komıssııanyń quramynda okýlıst-dáriger joq. Kóptegen aýdandarda okýlıst, lor, dermatolog, psıhıatr jáne nevropatologtar jetispeıdi. Shaqyrý naýqanynda ol dárigerler oblystyq densaýlyq saqtaý mekemesinen shaqyrtylady. Qosymsha medıtsınalyq tekserýden soń áskerge shaqyrtylǵan jastyń daıyndyǵy týraly sheshim qabyldaıtyn adam bolmaı qalady. Óıtkeni ol kezde dárigerlerdiń issapar merzimi aıaqtalady.
«Jergilikti áskerı basqarý organdaryn avtomobıl transportymen qamtamasyz etý máselesi de sheshilmegen. Áskerge shaqyrylǵandarǵa habar berý, olardy izdeý, áskerge shaqyrylýshylarmen jáne olardyń ata-analarymen kezdesý úshin aýyldyq aımaqtarǵa shyǵýǵa, jumysty uıymdastyrý úshin tıisti jerge barýǵa kólik bólinbeıdi»,-deıdi A.Tileýhanov.
Soltústik Qazaqstan oblysynyń ákimi Qumar Aqsaqalov medkomıssııany dárigerlermen qamtamasyz etý máselesi jyl saıyn talqylanatynyn jetkizdi. Ony jergilikti atqarýshy organdar Qorǵanys departamentimen birlese otyryp sheshýi qajet. Bıylǵy jyly áskerge 600 adamdy shaqyrý josparlanyp otyr.
