SQO-da áskerge shaqyrylýy tıis 14 myńnan astam azamat bar
PETROPAVL. KAZINFORM – Soltústik Qazaqstan oblysynan osy kúzde ásker qataryna 510 azamat alynýy tıis.
SQO Qorǵanys isteri jónindegi departamenttiń málimetinshe, ázirge shekara qyzmetinen ǵana 25 adamǵa ókimhat túsken. Óńir jigitteri Shyǵys Qazaqstan oblysynyń Kúrshim aýylynda ornalasqan shekara basqarmasyna attanady. Áskerge shaqyrý naýqany 31 jeltoqsanǵa deıin júredi.
Kóktemde jergilikti departament bekitilgen jospardy oryndaı almady. Oblystan 507 adam attanýy tıis bolsa, sonyń 432-si ǵana azamattyq boryshyn atqarýǵa ketti.
Shekara qyzmetine barýy kerek 35 jigittiń tek 12-si ketti, olar Kúrshimde boryshyn ótep jatyr. Qarýly kúshterge josparlanǵan 225 adamnyń 161-i alynyp, Qonaev, Aqtaý, Semeı, Aıagóz qalalaryna, Saryózek, Gvardeıskıı eldi mekenderine attandy. Memlekettik kúzet qyzmetine 6 adam alyndy, Tótenshe jaǵdaılar mınıstrligine shaqyrylǵan 17 jigit Almatyǵa ketti. Ulttyq ulanǵa 224 adamnyń ornyna 236 jigit alynyp, qazir Almaty, Astana, Qaraǵandy, Kókshetaý, Taraz, Qostanaı, Pavlodar, Temirtaýda áskerı qyzmetti ótkerip jatyr.
Vedomstvonyń málimetinshe, SQO-da áskerge shaqyrylýy tıis 14 myńnan astam jigit bar. Jastardyń áskerge barýǵa degen qyzyǵýshylyǵyn arttyrý maqsatynda elimizde birqatar ózgeris engizildi. Sonyń biri – boryshyn ótep kelgennen keıin aqysyz negizde joǵary oqý ornyna túsý. SQO-da byltyr 24 jigit osylaısha oqýǵa tústi.
Buǵan deıin elimizde kúzgi áskerge shaqyrý naýqany bastalyp, 22 myń jas Otan aldyndaǵy boryshyn óteıtindigin jazǵan edik.