SQO-da áskerge barýdan jaltarǵan 750-ge jýyq jigitke izdeý jarııalanǵan

PETROPAVL. KAZINFORM – Soltústik Qazaqstan oblysynda bıyl kúzde 500-ge jýyq jigit ásker qataryna alynýy tıis. Olardyń alǵashqy 10-y birer kúnde Otan aldyndaǵy boryshyn óteý úshin Almatyǵa attanady.

SQO qorǵanys isteri jónindegi departamenttiń merzimdi áskerı qyzmetke shaqyrý bóliminiń bastyǵy Ánýar Ibraevtiń aıtýynsha, qazirgi ýaqytta oblysta 14 myńnan astam jigit áskerge shaqyrylýshy retinde esepke alynǵan. Bıyl kóktemde SQO-dan 478 jigit áskerge alynýy tıis bolsa, sonyń 436 jiberildi, jospar tek 91% oryndaldy.

«2 qyrkúıekten bastap elimizde kúzgi áskerge shaqyrý naýqany bastaldy, ol jeltoqsanǵa deıin jalǵasady. Óńirden 500-ge jýyq adam attanýy tıis. Olar elimizdiń barlyq derlik óńirlerinde merzimdi áskerı qyzmetke alynady. Alǵashqy 10 adamdy 13 qyrkúıek kúni Almaty oblysyna jiberemiz. Olar shekara qyzmetinde áskerı boryshyn óteıdi», - deıdi Ánýar Ibraev.

Mamannyń aıtýynsha, qazirgi ýaqytta SQO boıynsha 743 adam áskerge barýdan jaltaryp júr. Olarǵa izdeý jarııalanǵan. 

«Polıtsııa departamentimen jumys isteımiz, tizimdi berdik. Ýchaskelik polıtseılerdiń kómegimen olardyń júrgen jerin anyqtaımyz. Jalpy áskerge barýdan qashqandarǵa qylmystyq jáne ákimshilik jaza qarastyrylǵanyn eske salǵym keledi. Belgilengen kúni kelmese 5 AEK mólsherinde aıyppul salynady. Al medıtsınalyq tekseristen ótýge barmasa eskertý alady nemese 3 AEK mólsherinde aıyppul qarastyrylǵan. Zańdyq negizsiz áskerge barýdan qashsa 1 myń AEK mólsherinde aıyppul salynady nemese 400 saǵatqa qoǵamdyq jumysqa jegiledi. Sondaı-aq 1 jylǵa deıin bas bostandyǵy shektelýi nemese osy aralyqqa bas bostandyǵynan aıyrylýy múmkin», - deıdi Ánýar Ibraev.

Buǵan deıin áskerılerdiń ómirine qaýip tónbes úshin tıisti sharalar qabyldanatynyn jazǵan edik.