SQO-da áskerge barmaý úshin shekara asatyndar bar
PETROPAVL. QazAqparat - Soltústik Qazaqstan oblysynda kúzgi merzimdi áskerge shaqyrý naýqanyn pysyqtaý maqsatynda nusqaýlyq-ádistemelik sabaq ótti, dep habarlaıdy QazAqparat.
SQO-da áskerge baratyn jigitterdiń sanyn toltyrý ózekti máselelerdiń birine aınalǵan. Bıyl kóktemde óńirden 600 adam Otan aldyndaǵy boryshyn óteýge attanýy tıis bolsa, oblystyq Qorǵanys isteri jónindegi departament jospardy 91% oryndap, tek 547 azamatty ǵana jóneltken. Sonyń ishinde Petropavldan 217 jigit barýy tıis bolsa, onyń ornyna 155-i ǵana ketken.
«Jalpy óńir áskerge kóktemgi shaqyrtý boıynsha jumystardy qanaǵattanarlyq aıaqtady. Sonyń ishinde Petropavl qalasy men Aıyrtaý aýdany ózderine júktelgen mindetterdi tolyqtaı oryndaı almady. Petropavl qalasynyń qorǵanys isteri jónindegi basqarmanyń esebinde áskerge shaqyrylýǵa jatatyn 2739 adam tirkelgen. Aıyrtaý aýdanynda 137 adam bar. Alaıda olardyń kópshiligi áskerge barýǵa asyǵar emes», - deıdi Petropavl garnızonynyń áskerı prokýrory Aıdos Rysqulov.
Departament qyzmetkerleri mekenjaılarǵa shyǵyp, páter-páterdi aralaǵanymen kóp jaǵdaıda jastardy ornynan tappaıdy. Qazir polıtsııada 759 adamnyń turǵylyqty jerin anyqtap berý boıynsha suranym jatyr. Tártip saqshylary olardyń tek 212 ǵana taýyp berdi. Áskerge shaqyrylýy tıis jastardyń arasynda shetel asyp ketetinder bar eken.
Jıynda aıtylǵan máselelerdiń biri – aýdandyq áskerı shaqyrý komıssııalarynda dárigerlerdiń jetispeýshiligi.
«Medıtsınalyq komıssııa sapasyz júrgiziledi. Saldarynan epılepsııa, gemofılııa, shızofrenııa, taǵy basqa aýrýlarǵa shaldyqqan azamattar áskerge shaqyrtylady. Bıyl kóktem aıynda Esil aýdanynan týa bitken júreginiń kemistigi bar 20 jastaǵy jigit ásker qataryna jiberilgen. Árıne, ol keıin qaıtaryldy», - deıdi SQO Qorǵanys isteri jónindegi departamenttiń bastyǵy Talǵat Áliqulov.
SQO-da kúzgi merzimdi áskerge shaqyrý jeltoqsan aıyna deıin jalǵasady. Óńirden 500 adam sarbazdar qataryn tolyqtyrmaqshy.
