SQO-da «Ashyq ákimdik» front-keńsesi ashyldy
«Ashyq ákimdik» front-keńsesi aýdan ortalyǵy Smırnov eldi mekeninde jumys isteıdi. Sybaılas jemqorlyqqa qarsy vedomstvo baspasóz qyzmetiniń málimetinshe, Aqqaıyńdyqtarǵa memlekettik qyzmetterdi jáne mamandardyń keńesin alý jeńildemek. Endi ákimdik qyzmetkerlerine kirip, máselesin sheshý úshin kabınet aldynda kezek kútýdiń qajeti joq.
Front-keńseniń jumysymen Sybaılas jemqorlyqqa qarsy is-qımyl agenttiginiń tóraǵasy Alık Shpekbaev jáne SQO ákimi Qumar Aqsaqalov tanysty.
Bul jerde toǵyz memlekettik organnyń qyzmetkerleri jumys isteıdi. Turǵyndarǵa yńǵaıly, keń zalda qyzmet kórsetiledi. Olar qujattaryn tapsyryp, memlekettik qyzmettiń barlyq túrleri boıynsha kómek alady, sondaı-aq aryz-shaǵymdaryn aıtyp, osy jerde jumysqa ornalasý máselesin sheshýge múmkindik bar.
«Bul tájirıbeni basqalary da engizýleri kerek. Barlyq kerekti mamandar bir jerde otyr. Turǵyndarmen tyǵyz qarym-qatynas ornatý baǵytynda qazir transformatsııa júrip jatyr. Ýaqyt óte kele ákimdikter jemqorlyqtan tolyq arylýy kerek», - dedi A.Shpekbaev.
«Ashyq ákimdik» qoǵamdyq qabyldaý formatynda jumys isteıdi. Eger de turǵynnyń máselesin sheshý úshin aýdan basshysynyń ne bolmasa orynbasarlarynyń kómegi qajet bolsa, ony azamattardy qabyldaýǵa arnalǵan 1 qabattaǵy kabınetke kirgizedi. Sondaı-aq, keńse qyzmetkerleri eldi mekenderdiń jaǵdaıyn jaqsartýǵa baǵyttalǵan turǵyndardyń usynystaryn jınap, saralamaq.
«Front-ofıster qalalyq, aýdandyq ákimdikterde ashylǵan. Jyl sońyna deıin taǵy úsh aýdanda iske qosylady. Bul turǵyndar úshin jasalyp jatyr. Olar bir jerde jumystaryn bitirip, ýaqyttaryn únemdeıdi», – dedi oblys ákimi Qumar Aqsaqalov.
Turǵyndar front-ofıstiń ózine-ózi qyzmet kórsetý aımaǵynda elektrondyq úkimettiń portalyna kirip, máselesin sheshe alady.
Sybaılas jemqorlyqqa qarsy vedomstvonyń málimetinshe, elimizde 686 memlekettik mekeme «Open space» formatynda jumys istep jatyr.
