SQO-da ashylǵaly turǵan eskertkish nege qıratyldy
PETROPAVL. KAZINFORM – Soltústik Qazaqstan oblysynda Alash qaıratkerlerine arnalyp salynǵan monýmentaldy nysan ashylmaı jatyp, jartylaı buzyldy.
Bul týraly áleýmettik paraqshasynda Zańǵar Kárimhan bólisti. Onyń aıtýynsha, Mirjaqyp Dýlatuly jıyn ótkizgen Qyzyljar óńiri burynǵy Aqqusaq qonysynda Alash qaıratkerleriniń urpaqtary, jekelegen kásipkerler memorıaldyq keshen saldy. Bıiktigi 28 metr bolatyn stella qyrkúıek aıynyń sońynda berilýi tıis edi. Alaıda eskertkish jartylaı buzylǵan. Qoǵam ókili buǵan oblys ákimin kinálady.
Osyǵan oraı SQO ákimdiginiń mádenıet, tilderdi damytý jáne arhıv isi basqarmasy jaýap berdi.
- Stella qurylysyn jergilikti atqarýshy organmen kelispeı kásipker N.Barlybaev bastaǵan. Ornatý kezinde tapsyrys berýshi aqaýlardy, stellanyń durys ornatylmaǵanyn anyqtady. Osy sebepti kásipkerdiń tapsyrmasymen joǵarǵy bóligi demontajdaldy. Sondaı-aq, Mádenıet basqarmasy N.Barlybaevqa stella ornatý úshin barlyq qajetti zańdy rásimderdi júrgizý qajettigi týraly eskertti. Monýmentaldy qurylys nysandaryn ornatý tártibi saqtalmaıynsha, eskertkish tarıh jáne mádenıet eskertkishteri memlekettik tizimine engizilmeıdi, - dedi basqarma basshysy Dosbol Ábdireıisov.
Ákimdik ókiliniń aıtýynsha, vandalızm faktisi tirkelgen joq. Qujattardyń bolmaýyna baılanysty Memlekettik sáýlet-qurylys baqylaý organy N.Barlybaevqa ákimshilik aıyppul saldy.
Osy oqıǵaǵa qatysty oblystyq máslıhattyń depýtaty Erbaqyt Amantaıuly da pikir bildirdi.
- Qyzyljardaǵy eskertkish máselesiniń astarynan Alashqa qarsy jaý izdeýdiń qajeti joq. Bul – meniń jeke pikirim. Bar gáp – ne jerge, ne qurylysqa ruqsat almastan salynýy. Senseńiz de sol, senbeseńiz de sol. Zańnyń talaby osy. Eger eskertkish salaıyn dep jatyrmyn dep ótinish berip, ony mádenıet basqarmasy nemese eskertkishter jónindegi komıssııa qabyldamaı qoısa, onda áńgime basqa. Memleket basshysy Qasym-Jomart Toqaev Qazaqstandy «eskertkishter eli» dep mazaqtaıtyndar bar ekenin, ruqsatsyz ata-babasyna qoladan quıyp, tastan qalap belgi qoıatyndar kóbeıip ketkenin bir emes, birneshe ret bıik minberden aıtty. Qulaq asqandar az. Petropavl degen ataýyna qarap, kóshelerinde áli sol Lenın men Stalın tur dep oılaıtyn shyǵarsyzdar. Múldem olaı emes. Abylaı han, Qojabergen jyraý, Abaı aqyn, Alash qaıratkerleri Maǵjan men Smaǵuldyń músinderi, jylqyny alǵash aýyzdyqtaǵan qazaq ekenin bildiretin eskertkish te Qyzyljardyń qaq tórinen oryn alǵan, - dep jazdy jelidegi paraqshasynda Erbaqyt Amantaıuly.
Buǵan deıin sońǵy bes jylda elimizdiń 10 óńirinde 49 eskertkish zań talaptaryn saqtamaı ornatylǵanyn jazǵan edik.