SQO-da asfaltbeton zaýyttary tekserilip jatyr
PETROPAVL. KAZINFORM – Soltústik Qazaqstan oblysynda asfaltbeton zaýyttaryna jol-qurylys maýsymyna daıyndyq aıasynda josparly tekseris bastaldy.
Baqylaý jumystaryn «Jol aktıvteri sapasynyń ulttyq ortalyǵy» RMK-nyń óńirlik fılıaly júrgizip jatyr. Tekseristiń basty maqsaty – asfaltbeton qospasynyń sapasyn qamtamasyz etý jáne óndiriske qajetti tehnologııalyq standarttardyń oryndalýyn baqylaý.
Fılıal mamandarynyń aıtýynsha, tekseris aıasynda:
tehnologııalyq jabdyqtardyń (bıtým saqtaý qoımalary, tarazylar, termometrler, shań ustaǵyshtar) jaramdylyǵy;
zerthanalardyń bar-joǵy jáne olardyń qajetti qural-jabdyqtarmen qamtylýy;
óndiris protsesinde talaptardyń saqtalýy (tarazylaý, temperatýralyq rejım, esep jýrnaldaryn júrgizý);
paıdalanylatyn materıaldar men jabdyqtarǵa arnalǵan sertıfıkattar men pasporttardyń bolýy;
jol-qurylys materıaldaryn saqtaý talaptarynyń oryndalýy;
daıyn qospalar quramynyń sapasy tekseriledi.
Búgingi kúnge deıin óńir boıynsha 27 asfaltbeton zaýyty tekserilgen. Onyń ishinde, 12 zaýyt barlyq talaptarǵa sáıkes dep tanylsa, bireýiniń jumysy toqtap tur. Eki zaýyt tapsyrys berýshiler men jetkizýshilerdiń joqtyǵyna baılanysty ýaqytsha toqtaǵan. 12 kásiporyn iske qosý-retteý jumystarynan ótip jatyr.
– Biz kásiporyndardyń jol-qurylys maýsymyna daıyndyq barysyn jáne tehnologııalyq talaptardyń oryndalýyn jiti baqylap otyrmyz. Qazir naqty sáıkessizdikter týraly aıtý erte, óıtkeni maýsym endi ǵana bastaldy. Qazirgi basty mindetimiz – qajetti qujattardy jınap, olardy jan-jaqty taldaý, – deıdi fılıal ókilderi.
Buǵan deıin Petropavlda daýyl botanıkalyq baqtyń shatyryn julyp áketkenin jazǵan edik.