SQO-da asa qajet dárigerlerdi daıarlaýǵa bıýdjetten qarajat bólindi

PETROPAVL. QazAqparat – Soltústik Qazaqstan oblysynda jyl basynda 285 dáriger jetispese, qolǵa alynǵan sharalardyń nátıjesinde medıtsınalyq kadrlarǵa degen suranys 65 paıyzǵa qysqardy, dep habarlaıdy QazAqparat tilshisi.

SQO densaýlyq saqtaý basqarmasynyń málimetinshe, jyldyń basynda Petropavldaǵy emdeý mekemelerine 229, aýyldyq jerlerge 56 maman qajet bolǵan. Maman tapshylyǵyn joıý maqsatynda SQO máslıhatynyń sheshimimen ótken jyldan bastap Petropavlǵa kelgen dárigerge 1,5 mln teńge, aýylǵa barǵan mamanǵa 2,5 mln teńge bir rettik kótermeaqy berile bastady.

«Budan basqa jas mamandarǵa «Dárigerler úıinen» arendalyq baspana beriledi. Sondaı-aq medıtsına qyzmetkerleri «7-20-25» ıpotekalyq turǵyn úı baǵdarlamasyna jáne «Nurly jer» baǵdarlamasyna qatysa alady. Al medıtsınalyq uıymdar kelgen mamandardyń arendalyq baspana tólemaqysynyń 50 % jabady. Balalaryn balabaqshaǵa, jubaılaryn jumysqa ornalastyrýǵa kómektesedi», - deıdi basqarmanyń baspasóz hatshysy Gúlnar Qalıeva.

Osyndaı jumystardyń nátıjesinde bıyl SQO-ǵa 185 dáriger, onyń 127-si qalaǵa, 58-i aýylǵa keldi. 77-si medıtsınalyq joǵary oqý ornynyń túlekteri. 108-i ózge óńirlerden qonys aýdarǵan tájirıbeli mamandar.

«Kelgen dárigerlerdiń 101-i tar beıindi maman, 84-i – ambýlatorlyq-emhanalyq qyzmettiń dárigeri. Búginge deıin 117 qyzmetker, sonyń ishinde 117-si 1,5 mln teńge, 47 dáriger 2,5 mln teńge kótermeaqy aldy. Byltyr oblysqa 108 dáriger kelip, olarǵa 220,5 mln teńge kótermeaqy aldy. Taǵy 150 maman «Dıplommen aýylǵa» baǵdarlamasy aıasynda kótermeaqyǵa qol jetkizdi. 2019 jyldan bastap oblystyq ákimdik tar beıindi mamandardy rezıdentýrada oqytý úshin bıýdjetten qarajat bólip keledi. Úsh jyl buryn oqýǵa túsken 77 rezıdenttiń byltyr 31-i oqýyn bitirip, 23-i qaıtyp oraldy. Qalǵany bıýdjet aqshasyn qaıtardy. Bıyl 46 rezıdent oqýyn aıaqtady. Olardyń 31-i jumysqa ornalasyp istep jatyr, 10-y bıýdjet aqshasyn qaıtardy, qalǵan beseýine sotqa deıingi talap jiberildi», - deıdi Gúlnar Qalıeva.

Mamannyń aıtýynsha, qazirgi ýaqytta Astana medıtsınalyq ýnıversıtetinde 148 rezıdent bilim alyp jatyr. Olardyń 60-y keler jyly, 2024 jyly 28-i kelmek.

Bıyl oblystyq ákimdik asa qajettilik týdyrǵan 16 mamandyq boıynsha 60 rezıdentti oqytýǵa aqsha bóldi. Osy jumystardyń nátıjesinde SQO-da medıtsınalyq kadrlarǵa degen suranys 64,9 % azaıdy.