SQO-da artyq jolaýshy otyrǵyzǵan avtobýs júrgizýshileri jazalandy
PETROPAVL. QazAqparat - Soltústik Qazaqstan oblysynda bir kúnde qoǵamdyq kólik júrgizý erejesin buzýǵa qatysty 134 derek anyqtaldy, dep habarlaıdy QazAqparat tilshisi.
Oblystyq ishki ister departamenti baspasóz qyzmetiniń aqparatyna súıensek, shamadan tys zııandy zat shyǵaratyn kólikti paıdalaný, jolaýshy, júk tasymaldaý erejelerin buzý, zańsyz qaıta jabdyqtaý sekildi faktiler jıi kezdesip jatyr. Keı júrgizýshide, tipti, kólik júrgizýge qajetti qujattar bolmaı shyqty.
«Túrkistan oblysyna bara jatqan avtobýsta jolaýshylar sany otyratyn oryndyqtan kóp ekeni anyqtaldy. Osyǵan baılanysty, 43 jastaǵy júrgizýshi ákimshilik jaýapqa tartyldy. Petropavldan Saryaǵashqa bara jatqan basqa bir avtobýsta alǵashqy medıtsınalyq kómek kórsetýge qajetti dári-dármek joq», - dep málimdedi ІІD baspasóz qyzmeti.
Oblystyq jergilikti polıtsııa qyzmeti bastyǵynyń mindetin atqarýshy Arystan Sultanǵazıevtiń aıtýynsha, mundaı operatsııalardy ótkizýdegi basty maqsat - jolaýshylardyń qaýipsizdigin qamtamasyz etý jáne jol apatynyń aldyn alý.
