SQO-da artemııa salına shaıandaryn zańsyz aýlaǵan eki adam bir jylǵa sottaldy

PETROPAVL. KAZINFORM – Aqmola oblysynyń eki turǵyny Soltústik Qazaqstan oblysy Taıynsha aýdanyndaǵy kólden 336 keliden astam artemııa salına shaıandaryn zańsyz aýlaǵan.

Qaraǵandy oblysynda brakonerlerden 2,5 tonnadan astam shaıan tárkilendi
Foto: Polisia.kz

SQO prokýratýrasynyń málimetinshe, oqıǵa 2025 jyldyń shilde aıynda bolǵan. Eki er adam aldyn ala kelisip, Taıynsha aýdanyndaǵy tuzdy kólge kózge túspeý úshin túnde kelgen. Alaıda zańsyz kásipteri uzaqqa sozylmady. Brakonerlerdi oqıǵa ornynda polıtsııa qyzmetkerleri ustady. Olardan zańsyz aýlanǵan bıoresýrs jáne aýlaý quraldary tárkilendi.

Saldarynan memleketke 5 mln 952 myń teńge shyǵyn kelgen. Sot barysynda aıyptalýshylar kinálaryn moıyndap, jasaǵan áreketterine ókinetinderin bildirdi. Sondaı-aq keltirilgen shyǵyndy tolyq ótedi. 

- Sot qylmystyń paıdakúnemdik sıpatyn, qylmystyń aldyn ala sóz baılasý arqyly jasalǵanyn jáne ekologııalyq zalaldyń iri mólsherin eskere otyryp, naqty bas bostandyǵynan aıyrý jazasyn taǵaıyndaý qajet dep tapty, - dep habarlady prokýratýradan.

SQO qylmystyq ister jónindegi mamandandyrylǵan aýdanaralyq soty bıyl qyrkúıekte aıyptalýshylardy kináli dep tanydy. Raqymshylyq týraly zań eskerilip, árqaısysyna bir jyl bas bostandyǵynan aıyrý jazasy belgilendi.

Úkim zańdy kúshine endi.

Mamandardyń aıtýynsha, artemııa salına shaıandary balyq sharýashylyǵynda, farmatsevtıkada, kosmetologııada jáne basqa da salalarda qoldanylady. Ony baqylaýsyz óndirý sý ekojúıesine jáne tabıǵı tepe-teńdikke zııan keltirýi múmkin. 

Buǵan deıin SQO-da úsh qabandy zańsyz atyp alǵan kúdiktiler ustalǵanyn jazǵan edik.