SQO-da Artemia salina shaıanyn zańsyz jolmen aýlaǵandar ustaldy
PETROPAVL. QazAqparat – Soltústik Qazaqstan oblysynda polıtseıler Artemia salina shaıanyn zańsyz aýlap, 5 qabyn artyp áketpek bolǵandardy ustady, dep habarlaıdy QazAqparat tilshisi.
SQO polıtsııa departamenti baspasóz qyzmetiniń málimetinshe, oblystyń jedel ýákilderi men tabıǵatty qorǵaý polıtseıleri Mamlıýt aýdanyndaǵy Meńgeser kóliniń jaǵasynda Artemia salina-ny aýlaǵan brakonerlerdi kóredi. Oqıǵa ornyna kelgen aýdandyq polıtsııa bóliminiń jedel-tergeý toby úsh er adamda aýlaýǵa ruqsat qaǵazynyń joǵyn anyqtady. Qyzyl shaıan farmatsevtıka men kosmetıka óndirisinde qoldanylady. Asa qundy shıkizat bolyp esepteledi.
Ekologııalyq qylmysqa kúdiktilerdiń biri - 37 jastaǵy Taıynsha aýdanynyń turǵyny, sondaı-aq Almaty jáne Shyǵys Qazaqstan oblystarynyń 31 jastaǵy turǵyndary ustaldy. Atalǵan fakti QR Qylmystyq kodeksiniń 335-baby «Balyq resýrstaryn, basqa da sý janýarlaryn nemese ósimdikterin zańsyz alý» boıynsha Sotqa deıingi tergep-tekserýlerdiń biryńǵaı tizilimine engizildi. «VAZ-21140» avtokóligi, aýlaýǵa arnalǵan quraldar men 5 qap bıologııalyq zat tárkilendi.
«Úlgiler sot-saraptamalyq zertteýge jiberildi. Onyń nátıjesi boıynsha oblys tabıǵatyna keltirilgen shyǵynnyń somasy belgilenedi. Aýdan aýmaǵynda erekshe qorǵalatyn tabıǵı aımaq - Mamlıýt qoryǵy ornalasqan. Bıoresýrstardy qorǵaýǵa da erekshe kóńil bólinedi. Ekologııalyq qylmystardyń aldyn alý boıynsha jumys júrgiziledi», - deıdi aýdandyq polıtsııa bóliminiń bastyǵy Petr Klımov.
