SQO-da arnaıy ekonomıkalyq aımaq quryldy
SQO ákimi Qumar Aqsaqalov jaǵymdy jańalyqty óziniń áleýmettik jelidegi paraqshasynda bólisti.
«Qymbatty dostar, meniń sizderge aıtar jaqsy jańalyǵym bar. Búgin QR Úkimetiniń «Qyzyljar» arnaıy ekonomıkalyq aımaǵyn qurý týraly qaýlysy shyqty. Munyń Soltústik Qazaqstan oblysy úshin mańyzy zor. Arnaıy ekonomıkalyq aımaqqa zamanaýı jáne ónimi eksportqa baǵyttalǵan óndiris oryndary kiredi. Bul kásiporyndarda jańadan 3 myń jumys orny ashylmaq. Alǵashqy kezeńde 160 mlrd teńge ınvestıtsııalyq qarjy jumsalady. Arnaıy ekonomıkalyq aımaq 25 jyl jumys istep, osy aralyqta 1,5 trln teńgeniń ónimi shyǵarylady», - dep jazdy Qumar Aqsaqalov.
Bul – Qazaqstan men Reseı Federatsııasynyń shekaralas óńirlerinde ashylyp otyrǵan alǵashqy jáne jalǵyz arnaıy ekonomıkalyq aımaq. Nátıjesinde, azyq-túlik ónimderi, qurylys materıaldary, jıhaz, elektronıka men mashına jasaý ónidirisi bir jerde bolady. Budan bıznestiń utary kóp. Memleket ınfraqurylymdy tartyp, jeńildetilgen salyq júıesin engizedi.
«Bizdiń arnaıy ekonomıkalyq aımaq alys-jaqyn sheteldiń, RF men elimizdiń basqa oblystarynyń ınvestorlaryn qyzyqtyrady ǵoı degen senimdemiz. Bul joba óńirdiń damýyna zor úles qospaq», - dedi óńir basshysy.
