SQO-da árbir tórtinshi kásiporyndy qyz-kelinshekter basqarady
PETROPAVL. QazAqparat - Halyqaralyq áıelder kúni qarsańynda Soltústik Qazaqstan oblysynyń ákimi Qumar Aqsaqalov soltústikqazaqstandyq áıelderdi merekemen quttyqtady, dep habarlaıdy QazAqparat tilshisi.
Saltanatty jıyn N.Pogodın atyndaǵy orys drama teatrynda ótti. Kezdesýge kelgen qyz-kelinshekterge teatr foıesinde gúl shoqtary usynylyp, olardyń merekelik kóńil kúıleri eselene tústi.
Óz sózinde óńir basshysy áıelder qaýymynyń el jáne óńir damýyna qosyp jatqan úlesi zor ekenin atap ótti. Qazir memlekettik organdarda áıelder basshylyq qyzmet atqaryp júr. Óńirde árbir úshinshi depýtat - názik jandy. Memlekettik qyzmetshilerdiń 63 paıyzy áıelder bolyp tabylady. Óńirdegi árbir tórtinshi kásiporyndy qyz-kelinshekter basqarady. Qyzyqty jaıt - Soltústik Qazaqstan oblysy aýdan ákimderiniń áıel orynbasarlary sany boıynsha elde kósh basynda.
«Bizdiń oblys respýblıkada aýdan ákimderiniń orynbasarlary sany boıynsha birinshi oryn alady. Basshylyqta júrgen áıelder er adamdarǵa qaraǵanda júktelgen mindetterdi minsiz atqarady, ıaǵnı jaýapkershilikteri joǵary. Biz áıel azamattardy memlekettik qyzmetke tartyp, basshylyqqa usynýdy jalǵastyra beremiz. Meniń oıymsha, áıelder aýdan ákimi bolatyn kez kelgen sııaqty», - dedi Qumar Aqsaqalov.
Óńir basshysy otbasy men qoǵamda erekshe oryn alatyn ananyń mańyzdy rólin atap ótti. Kóp balaly analarǵa oblys ákimi «Kúmis alqa» belgisin tabys etti. Sonymen qatar oblystyń áleýmettik-ekonomıkalyq jáne mádenı damýyna qosqan úlesi úshin birqatar áıel oblys ákiminiń Qurmet gramotasy men Alǵys hattaryna ıe boldy.
Aqerke Dáýrenbekqyzy
