SQO-da ara shaqqan er adam ólim aýzynan qaldy

PETROPAVL. KAZINFORM – Soltústik Qazaqstan oblysynda 62 jastaǵy er adamdy ara shaǵyp, jansaqtaý bólimine tústi.

Petropavl qalalyq kópbeıindi jedel medıtsınalyq járdem aýrýhanasynyń málimetinshe, er adam emdeý mekemesine jetkizilgen kezde qan qysymy 80/40 bolǵan. Ol tońyp, qaltyrap, áli quryp, basynyń aınalǵanyna jáne ara shaqqan jerdiń qyzaryp ketkenine shaǵymdanǵan.

Syrqattyń aıtýynsha, ol dosynyń omartasyna barǵanda ara shaqqan. Jándiktiń bizgegin ózi alyp tastaǵan, biraq kóp uzamaı densaýlyq jaǵdaıy qıyndaı túsken.

Medıtsına qyzmetkerleri anafılaktıkalyq shoktyń belgilerin tanyp, jedel járdem sharalaryn qabyldady: er adamǵa birden adrenalın men gormondar egildi, kezekshi reanımatolog shaqyryldy. Syrqat reanımatsııa bólimine shuǵyl jatqyzyldy.

- Er adam basynda aýrýhanaǵa jatýdan bas tartty, alaıda oǵan bul jaǵdaıdyń qaýiptiligin túsindirip, jatýǵa kóndirdik. Qazir jaǵdaıy turaqtaldy, terapııa bólimine aýystyrylyp, em alyp jatyr. Ara shaqqannan allergııalyq reaktsııa berip, syrqat anafılaktıkalyq shok alǵan. Bir ǵana jándiktiń shaqqany ómirge qaýip tóndiretin reaktsııa berýi múmkin. Sondyqtan alǵash belgiler paıda bolǵan jaǵdaıda ýaqyt joǵaltpaı, jedel járdem shaqyryńyz, - deıdi aýrýhana dárigerleri.

Buǵan deıin SQO-da medbıke eki balanyń ólimine qatysty sottalǵanyn jazǵan edik.