SQO-da ár úshinshi quqyqbuzýshylyq mas kúıde jasalady
PETROPAVL. KAZINFORM – Soltústik Qazaqstan oblysynda byltyr tirkelgen qylmystardyń 635-i nemese 31% mas kúıde jasalǵan.
SQO Polıtsııa departamentiniń bastyǵy Abaı Júsipovtyń aıtýynsha, osy jyldyń alǵashqy eki aıynda spırttik ishimdik ishýdiń saldarynan quqyqbuzýshylyq 12%, 93 deregi tirkelgen. Ásirese, adam óltirý qylmysy ishimdik ishýmen tikeleı baılanysty.
- Adam óltirý faktileriniń 90% astamynda qylmyskerler mas bolǵan. Kóp jaǵdaıda mundaı oqıǵalar otbasylyq-turmystyq janjaldardan týyndaıdy. Byltyr kisi óltirý sany 43% artyp, 14-ten 20-ǵa deıin ósti.
Osyǵan baılanysty aldyn alý jumystaryn kúsheıttik. Profılaktıkalyq sharalar nátıje bere bastady. Osy jyldyń eki aıynda kisi óltirý deregi 80% tómendep, 5-ten 1 jaǵdaıǵa deıin azaıdy, - deıdi Abaı Júsipov.
Byltyr qoǵamdyq oryndarda ishimdik ishkeni jáne mas kúıinde júrgeni úshin 11,6 myńǵa jýyq ákimshilik quqyqbuzýshylyq anyqtalǵan. Alkogolge táýeldi 185 adam májbúrli emdeýge jiberilgen. Sot arqyly myńnan astam adamǵa turmysta alkogol qoldanýǵa tyıym salyndy.
Sonymen qatar, zańsyz ishimdik saýdasyna qarsy kúres barysynda 115 zańbuzýshylyq jáne spırti bar ónimdi zańsyz satýdyń 310 faktisi tirkelip, aınalymnan 5 tonnadan astam alkogol tárkilendi. Bıyldyń ózinde 1 885 lıtr zańsyz ónim alynǵan.
- Aýyl turǵyndary arasynda ishimdikten tolyq bas tartý tájirıbesi keń qoldanylyp keledi. Qazirdiń ózinde 37 aýylda alkogol satylmaıdy. Nátıjesinde bul eldi mekenderde qylmys múlde tirkelmegen, - deıdi Abaı Júsipov.
Buǵan deıin SQO-da byltyr ınternet alaıaqtar turǵyndardy 1,4 mlrd teńgege aldaǵanyn jazǵan edik.
