SQO-da ár on úshinshi oqýshy memleketten kómek alady

PETROPAVL. QazAqparat – Soltústik Qazaqstan oblysynda 2,2 myń bala kepildendirilgen áleýmettik kómek alady, bul maqsatqa bıyl 95 mln teńge jumsaldy, dep habarlaıdy QazAqparat tilshisi.

SQO ákiminiń birinshi orynbasary Marat Tasmaǵanbetovtyń aıtýynsha, búginde memleketten 10,5 myńnan astam bala nemese oqýshylardyń 15 %, kolledj stýdentteriniń 467-si nemese 4 % kómek alady. Memlekettik tapsyrys boıynsha 8,5 myńnan astam jas nemese kolledj stýdentteriniń 80 % oqıdy. Áleýmettik osal topqa atatyn otbasylardyń balalary tolyq tegin ystyq tamaqpen qamtylǵan.

«2022-2023 oqý jylynda 9-synyp túlekteri úshin tehnıkalyq jáne kásiptik orta bilim uıymdarynda memlekettik tapsyrys 300 orynǵa ulǵaıtyldy. Kepildendirilgen áleýmettik paketpen 2256 bala qamtamasyz etildi, bul maqsatqa 95,2 mln teńge jumsaldy», - dedi Marat Tasmaǵanbetov.

Óskeleń urpaqtyń sapaly bilim alýyna, olardyń densaýlyǵy men qaýipsizdigine jaǵdaı jasaýǵa, erekshe bilim berý qajettilikteri bar balalardy qoldaýǵa, sport pen salamatty ómir saltyn nasıhattaýǵa, sondaı-aq shyǵarmashylyqty damytýǵa baǵyttalǵan is-sharalardy iske asyrý jospary jasaldy. Jalpy Balalar jyly aıasynda josparlanǵan is-sharany júzege asyrýǵa 15 mlrd teńge bólindi.

Sondaı-aq, ákim orynbasarynyń aıtýynsha, «Jaıly mektep» jobasy aıasynda sońǵy jyldary oblysta 4 jańa mektep salyndy. Qazirgi ýaqytta Taıynsha qalasynda 600 oryndyq, Vıshnevka aýylynda 120 oryndyq eki mekteptiń qurylysy júrip jatyr.

2025 jylǵa deıin Petropavlda 3,3 myń bala syıatyn taǵy 4 mektep iske qosylady.

«4 jyl ishinde 327 bilim berý nysany jóndeldi. Bul oblys mektepteriniń 70 % jańartýǵa jáne 40 myńnan astam oqýshy úshin jaıly jáne qaýipsiz oqý jaǵdaıyn jasaýǵa múmkindik berdi. Nátıjesinde SQO sapaly bilim berý reıtıngisinde ekinshi orynnan kórindi», - deıdi Marat Tasmaǵanbetov.