SQO-da ár aýdanda úı janýarlaryn ýaqytsha ustaý pýnktteri salynbaq

PETROPAVL. QazAqparat – Soltústik Qazaqstan oblysynda aýdan ortalyqtarynda úı janýarlaryn ýaqytsha ustaý pýnktteri salynady. Qurylysty bastaý úshin osy maqsatqa jer ýchaskelerin bólý jumystary júrgizilip jatyr, dep habarlaıdy QazAqparat tilshisi.

SQO veterınarııa basqarmasynyń málimetinshe, aýdandyq jáne Petropavl ákimdigi úı janýarlaryn ýaqytsha ustaý pýnktterine jer bólýi tıis. Qyzyljar aýdany Beskól aýylynda tıisti ýchaske anyqtalyp, 0,19 ga berildi. Eskızdik jobasy da daıyn.

Budan basqa Taıynsha, Aqqaıyń jáne Maǵjan Jumabaev aýdandarynda da jumys bastalyp ketti. Jer komıssııalarynyń otyrysynda qajet ýchaske anyqtaldy.

Qazirgi ýaqytta úı janýarlaryn ýaqytsha ustaý pýnktterin angar tárizdes etip salý máselesi qaralyp jatyr.

Mamandardyń aıtýynsha, búginde SQO-da qańǵyrǵan úı janýarlaryna arnalǵan úsh panajaı bar. Petropavldaǵy «Belyı Bım» 400 ıtti qabyldaı alady, «Isakov Andreı» jeke qaıyrymdylyq qorynyń panajaıy 300 mysyq pen 500 ıtke arnalǵan. Al Qyzyljar aýdany Vıshnevka eldi mekenindegi «Shans na jızn» dep atalatyn panajaı 500 ıtti qamqorlyqqa alǵan.

Budan basqa Petropavlda «Vernyı drýg» jáne «Faýna» dep atalatyn janýarlardy qorǵaý uıymdary jumys isteıdi.

Polıtsııa organdarynyń deregi boıynsha, SQO-da ıtter men mysyqtardy ustaý jáne serýendetý qaǵıdalaryn buzǵany úshin byltyr 780 adam ákimshilik jaýapkershilikke tartyldy. Onyń 558 eskertý alsa, 222 adamǵa aıyppul salyndy.