SQO-da ár aýdan ortalyǵynda ınklıýzııa kabınetteri ashylady
PETROPAVL. QazAqparat – Soltústik Qazaqstan oblysynda ótken jyly 6 aýdan ortalyǵynda ınklıýzııa kabıneti ashyldy. Bıyl bul jumystar jalǵasyn tappaq, dep habarlaıdy QazAqparat tilshisi.
SQO Bilim basqarmasynyń málimetinshe, Shal aqyn aýdanyndaǵy E.Bóketov atyndaǵy orta mektep-gımnazııasynda erekshe bilim berý qajettiligi bar 25 balaǵa arnalǵan ınklıýzııany qoldaý kabıneti ashyldy. Bul – sońǵy úsh aıda aýdan ortalyqtarynda ashylǵan osymen altynshy kabınet.
Inklıýzııa kabınetinde balalardy damyta otyryp bilim berý úshin bar jaǵdaı jasalǵan. Osy maqsatta zamanaýı qural-jabdyqtarmen jáne oqý-ádistemelik keshendermen jabdyqtaldy.
Óńirde múmkindigi shekteýli 2 159 bala turady. Shal aqyn aýdanynda ǵana týasynan 18 jasqa deıingi 209 «erekshe» bala bar. 2020 jyldyń naýryzyna deıin oblysta taǵy da 6 kabınet ashylady dep josparlanǵan.
«Oblystyń barlyq aýdan ortalyqtarynda ınklıýzııa kabınetterin ashý bastamasyn júzege asyryp jatyrmyz. Bul – erekshe qajettilikteri bar balalar úshin úlken kómek», - deıdi oblys ákimi Qumar Aqsaqalov.
Petropavlda ótken jyly kópten kútken aýtızm ortalyǵy ashyldy. «Aýtızm. Álem barshaǵa ortaq» — bul Qazaqstandaǵy segizinshi ortalyq, munda aýtıstik spektri buzylǵan balalarǵa joǵary bilikti kómek tegin kórsetiledi. Ortalyqqa qazir 150-den astam bala baryp júr. Jalpy oblysta 400-den astam balaǵa aýtızm dıagnozy qoıylǵan.
