SQO-da aptap ystyq: aýa temperatýrasy kópjyldyq normadan 5 gradýsqa joǵary

Búgin Petropavlda synap baǵanasy 34 gradýsqa deıin kóterildi. Maýsym aıyndaǵy aptap ystyq óńirge tán emes. «Qazgıdromet» kásiporny oblystyq fılıalynyń málimetinshe, sońǵy ret mundaı aýa raıy 1989 jáne 2015 jyldary tirkelgen.

Sınoptıkterdiń aıtýynsha, qazir oblys aýmaǵyna Orta Azııa men Ortalyq Qazaqstannyń shóldi aımaqtarynan kelgen qurǵaq ári qatty qyzǵan tropıkalyq aýa massalary áser etip jatyr. Sonymen qatar, keı jaǵdaıda óńirdegi salqyn ári qurǵaq aýa massalary jer betiniń qyzýynan tez jylyp, ylǵalyn joǵaltady. Saldarynan qýańshylyqtyń kúsheıýine jáne ańyzaq jelderdiń paıda bolýyna yqpal etedi.

— Bıylǵy maýsym aıynyń basty ereksheligi — uzaqqa sozylǵan aptap ystyq. Aı bastalǵaly oblystaǵy aýa temperatýrasy kópjyldyq ortasha kórsetkishterden 3–5 gradýsqa joǵary tirkeldi. Óńir boıynsha ortasha aýa temperatýrasy +20…+23°S shamasynda boldy. Kúndiz termometr baǵandary +28…+33°S-qa deıin kóterilse, oblystyń shyǵys jáne ońtústik-shyǵys bólikterinde +35…+36°S-qa deıin jetti, — deıdi mamandar.

Sınoptıkterdiń boljamynsha, shildede de óńirde ystyq aýa raıy saqtalady. Aılyq ortasha aýa temperatýrasy +19…+21°S bolmaq. Bul klımattyq normadan shamamen 1 gradýsqa joǵary.

Shildeniń alǵashqy onkúndiginde túngi aýa temperatýrasy +4…+9°S-tan +9…+14°S-qa deıin, al kúndiz +20…+25°S pen +25…+30°S aralyǵynda qubylady. Onkúndiktiń sońyna qaraı kún qaıta ysıdy.

Ekinshi onkúndiktiń basynda aýa temperatýrasynyń odan ári joǵarylaýy kútiledi. Túnde +17…+22°S, al kúndiz qatty ystyq bolyp, +31…+36°S-qa deıin jetýi múmkin. Keıin temperatýra túnde +12…+22°S, kúndiz +26…+36°S aralyǵynda qubylyp turady. Onkúndiktiń sońynda azdap salqyndaýy múmkin.

Úshinshi onkúndikte túngi temperatýra +9…+20°S, kúndiz +23…+34°S aralyǵynda bolady dep kútiledi.

Shilde aıynda oblystyń basym bóliginde jaýyn-shashyn mólsheri klımattyq norma shamasynda bolady dep boljanǵan. Aılyq norma 56–81 mm aralyǵynda.

Aı boıy jańbyr jaýyp, naızaǵaı oınaýy jáne jeldiń sekýndyna 15–20 metrge deıin kúsheıýi jıi baıqalmaq. Burshaq birinshi jáne ekinshi onkúndiktiń ortasynda kútiledi.

Birinshi jáne úshinshi onkúndiktiń sońynda tuman túsýi yqtımal. Al ekinshi onkúndiktiń ortasynda shańdy daýyl bolýy múmkin.

Buǵan deıin elimizdiń 4 qalasynda aýa sapasy nasharlaıtynyn jazǵan edik.