SQO-da apaly-sińlili úsh áıel 30 jyl qujatsyz turyp kelgen
PETROPAVL. QazAqparat – Soltústik Qazaqstan oblysy Maǵjan Jumabaev aýdanyndaǵy apaly-sińlili úsh áıel 30 jyl boıy qujatsyz ómir súrgen, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń málimetinshe, apaly-sińlili Nuǵymanovalar Reseıdiń Omby oblysynda dúnıege kelipti. 1990 jyly qyzdardyń úlkeni 6 jasqa tolǵanda ata-analary Qazaqstanǵa qonys aýdarǵan. Aýyldyq jerde turyp kelgen olardyń buǵan deıin qujattary da, oǵan qajettilik te múlde bolmaǵan eken. Keıin másele týyndaı bastaǵannan keıin aýyl turǵyndary «Jolda qabyldaý» aktsııasy barysynda SQO Polıtsııa departamentiniń bastyǵy Marat Tólebaevqa júgindi.
Jeke kýálikti resimdeýge týý týraly kýálikteriniń joǵalýy, Reseı tarapynan qajetti jaýaptyń kelmeýi sebep bolǵan. SQO PD Kóshi-qon qyzmeti basqarmasynyń qyzmetkerleri Reseıdegi QR elshiligi men adam quqyqtary jónindegi halyqaralyq bıýromen baılanysqa shyǵyp, qyrýar jumys atqardy. Nátıjesinde, birshama ýaqyttan soń olardyń máseleleri sheshimin tapty. Polıtseıler Darıha, Kámesh, Dánııa Nuǵymanovalarǵa jeke kýálikterin alýǵa joldama qujatyn berdi.
«Bizdiń máseleni sheshýge kómek kórsetkeni úshin polıtsııa qyzmetkerlerine zor alǵysymyzdy aıtamyz. Meniń ulym da kolledjge oqýǵa túse alady. Men SQO Polıtsııa departamentine júginbegende qujattarymyzdy almaıtyn edik», - deıdi Darıha Sahaýtdınova.
Polıtseıler «Jolda qabyldaý» aktsııasyn zamanýı formatta ótkizgen jón dep sanaıdy.
«Búgingi tańda áleýmettik jeliler halyqty aqparattandyrýdyń tıimdi quraly bolyp otyr. Biz osyny paıdalanyp, azamattardan ózderiniń, qart týystarynyń qujattaryn retke keltirýlerin suraımyz. Apaly-sińlili Nuǵumanovalardyń máselesi ókinishke oraı, búgingi kúnde kezdesip jatady», – deıdi SQO PD Kóshi-qon qyzmeti basqarmasynyń bastyǵy Talǵat Ábilov.
