SQO-da ańshylyq maýsymy qashan bastalady
PETROPAVL. KAZINFORM — Soltústik Qazaqstan oblysynda 2026–2027 jylǵy ańshylyq maýsymynyń merzimderi jarııalandy.
Ańshylyqpen aınalysatyndar úshin ár janýar men qus túrine qatysty ruqsat etilgen merzimder qarastyrylǵan. Sondaı-aq ań-qusty arnaıy bekitilgen ańshylyq alqaptarda ǵana aýlaýǵa bolady.
SQO orman sharýashylyǵy jáne janýarlar dúnıesi aýmaqtyq ınspektsııasynyń málimetinshe, 15 maýsymnan bastap sýyrdy aýlaýǵa ruqsat beriledi. Ańshylyq janýar qysqy uıqyǵa ketkenshe deıin jalǵasady.
Terisi baǵaly ańdarǵa, máselen ondatrǵa ańshylyq osy jyldyń 1 qazanynda bastalyp, 2027 jylǵy 15 aqpanǵa deıin sozylady.
Al qarsaq, túlki, dala kúzeni, aqkis, aqqalaq jáne qoıan aýlaýǵa 1 qarashadan 15 aqpanǵa deıin ruqsat etilgen. Al ańshy ıtter jáne qyran qustardy paıdalanǵan jaǵdaıda bul ańdardy aýlaý maýsymy 15 qazannan bastalady.
Ózen qundyzyn aýlaý 15 qyrkúıekten 30 qarashaǵa deıin ruqsat etiledi.
Qustarǵa keler bolsaq, 1 shildeden bastap balshyqshy qusyna ańshylyq maýsymy bastalady. Ol 30 qarashaǵa deıin jalǵasady.
Bódene men kógershindi 20 tamyzdan 30 qarashaǵa deıin atýǵa ruqsat berilmek. Al ańshylyqqa ıtter men qyran qustardy qosqan jaǵdaıda bódene aýlaýǵa 15 shildeden qustar jyly jaqqa ushyp ketkenge deıin ruqsat etiledi.
Qaz, úırek jáne qasqaldaqqa ańshylyq tamyz aıynyń sońǵy senbisinen, ıaǵnı 29 tamyzdan bastalyp, 30 qarashaǵa deıin jalǵasady.
Kekilikti aýlaýǵa qyrkúıek aıynyń alǵashqy senbisinen, ıaǵnı 5 qyrkúıekten bastap shyǵýǵa bolady, ańshylyq merzimi 30 qarashada aıaqtalady.
Qurǵa ańshylyq ta 5 qyrkúıekten bastalyp, 15 jeltoqsanǵa deıin jalǵasady. Al ańshy ıtter men qyran qustardy paıdalanǵan jaǵdaıda qur aýlaý maýsymy 15 tamyzdan ashylady.
Budan bólek borsyq aýlaý merzimi 1 qyrkúıek pen 15 qarasha aralyǵyn qamtıdy.
Janat tárizdi ıtke ańshylyq 1 qyrkúıekte bastalyp, qysqy uıqyǵa ketkenshe júrgiziledi.
Qaban aýlaý maýsymy 5 qyrkúıekten bastalyp, 31 jeltoqsanda aıaqtalady.
Sibir eliginiń, maraldyń jáne bulannyń atalyqtaryn 15 shildeden aýlaýǵa, analyqtary men tólderin 15 qyrkúıek pen 31 jeltoqsan aralyǵynda ǵana atýǵa ruqsat berilgen.
Buǵan deıin Májilis depýtattarynyń kıik sanyn retteý máselesin ańshylyq qojalyqtarǵa da berý usynysyna Úkimet qarsylyq tanytqanyn jazǵan edik.
