SQO-da «Ańsaǵan sábı» baǵdarlamasy boıynsha 91 áıel jaqynda náresteli bolmaq
PETROPAVL. QazAqparat – Soltústik Qazaqstan oblysynda «Ańsaǵan sábı» baǵdarlamasynyń nátıjesinde kópten bala kútip júrgen 91 erli-zaıypty náresteli bolmaq, dep habarlaıdy QazAqparat tilshisi.
SQO ákimdikte ótken jıynda vırýsqa qarsy qaýipsizdik ortalyǵynyń basshysy Qanysh Bıjanov densaýlyq salasynda atqarylǵan jumystardyń keıbirine toqtaldy. Mamannyń aıtýynsha, bıyl óńirde perınataldyq ortalyq janynan genetıkalyq zerthana ashyldy. Bul júkti áıelderdiń qursaǵyndaǵy sharananyń týa bitti genetıkalyq aýytqýyn der kezinde anyqtaýǵa múmkindik beredi. Buǵan deıin oblystyń 300-den astam júkti áıeli osyndaı tekserýden ótý úshin respýblıkanyń basqa óńirlerine barýyna týra keletin. Al zertteýler aqyly jasalatyn. Ortalyq ashylǵan 4 aıdyń ishinde 50-den astam bolashaq ana tegin tekserilip, 8 jaǵdaıda genetıkalyq aýrýlar anyqtaldy.
«Bul – elimizdiń soltústiginde ashylǵan alǵashqy zerthana. Dıagnostıkalyq qyzmetti eshqaıda barmaı-aq alý áıelderdiń jáne olardyń balalarynyń densaýlyǵyn saqtaýǵa kómektesedi. Sondaı-aq bıyl balalarǵa arnalǵan ońaltý ortalyǵy ashyldy. Buryn elordada nemese shetelde mamandardyń kómegine júgingen 150 bala em-dom aldy», - deıdi Qanysh Bıjanov.
SQO-da «Ańsaǵan sábı» baǵdarlamasy suranysqa ıe. Bıyl 218 erli-zaıypty EKO-dan ótýge jiberildi. Olardyń 91-i jaqynda kópten kútken sábılerin baýyrlaryna baspaq. ıAǵnı, baǵdarlamaǵa qatysqan juptardyń 41,7 %-y sábı súıedi.
