SQO-da ana ólimin jasyrý faktisine qatysty tekseris aıaqtaldy
Petropavldaǵy «Adaldyq alańynda» medıtsınalyq jáne farmatsevtıkalyq baqylaý komıtetiniń SQO boıynsha departamenti Bolshoı Izıým eldi mekeniniń 35 jastaǵy turǵyny Áıgerim Qazezovanyń ólimine qatysty júrgizilgen tekseristiń qorytyndysyn jarııalady.
Áıgerim Qazezova byltyr besinshi balasyn dúnıege ákelip, oblystyq kópbeıindi aýrýhanada kóz jumǵan.
Biraq dárigerler onyń ólimin tek bir aıdan keıin, Taıynsha aýdandyq aýrýhanasynda qyrkúıekte ǵana tirkegen. Máıitti týystaryna esh qujatsyz berip, ózderi aýdandyq aýrýhanada ony qaǵaz júzinde taǵy bir aı koronavırýstan emdegen. Marqumnyń «emine» shamamen 2 mln teńge jumsalypty.
Tekseris kezinde arnaıy komıssııa eki medıtsınalyq mekemeniń 10-ǵa jýyq qyzmetkeriniń zańsyz áreketin áshkereledi.
«Dárigerlerdiń aıtýynsha, olar ana ólimin jasyrý arqyly oblystyq statıstıka kórsetkishin saqtap qalǵysy kelgen. Ana ólimi faktisiniń jasyrylǵanyn anyqtadyq. Soǵan qosa, birqatar kemshilikterdi anyqtap, jospardan tys tekserý qorytyndysy boıynsha materıaldardy quqyq qorǵaý organdaryna jáne de dendaýlyq saqtaý basqarmasyna berdik. Endi osy materıaldar boıynsha protsessýaldyq sheshim qabyldanady dep oılaımyn.
Oblystyq aýrýhanaǵa toqtalatyn bolsaq, dárigerler ana ólimin jasyrmaq bolyp, ujymdyq sheshim qabyldaǵan. Qazir olar óz kinálaryn tolyǵymen moıyndap otyr. Al Taıynsha aýdandyq arýhanasynyń mamandary bas dárigerdiń nusqaýymen jumys istegendigin aıtty», - deıdi medıtsınalyq jáne farmatsevtıkalyq baqylaý komıtetiniń SQO boıynsha departamenti basshysy Darhan Turlybekov.
Departament basshysynyń aıtýynsha, áıeldiń naqty neden qaıtys bolǵany belgisiz, óıtkeni tıisti sharalar júrgizilmegen. Tergeý jalǵasatyn bolady. Bul fakti boıynsha barlyq qujattar prokýratýraǵa, polıtsııa departamentine, densaýlyq saqtaý basqarmasyna, oblystyq medıtsınalyq saqtandyrý qoryna jáne sybaılas jemqorlyqqa qarsy is-qımyl agenttiginiń departamentine joldandy.
Jalpy byltyr óńirde Áıgerim Qazezovanyń jaǵdaıyn qospaǵanda úsh ana ólimi tirkeldi.