SQO-da ań aýlap júrgen er adam abaısyzda serigin atyp óltirdi
PETROPAVL. QazAqparat – Soltústik Qazaqstan oblysynda 55 jastaǵy er adam ózimen birge ań aýlaýǵa shyqqan 64 jastaǵy jerlesin abaısyzda atyp aldy, dep habarlaıdy QazAqparat tilshisi.
SQO polıtsııa departamenti baspasóz qyzmetiniń málimetinshe, oqys oqıǵa 6 tamyz kúni Shal aqyn aýdanynyń Nejdanovka aýyly mańyndaǵy ormanda bolǵan.
55 jastaǵy Aıyrtaý aýdanynyń turǵyny ań aýlaý kezinde elikke oq atqan, alaıda, bytyranyń bir bóligi qasyndaǵy serigine – 64 jastaǵy Aıyrtaý aýdanynyń turǵynyna tıgen.
Er adam alǵan jaraqatynan oqıǵa ornynda kóz jumdy.
Bul fakti QR Qylmystyq Kodeksiniń 99-1-baby «adam óltirý» boıynsha tirkeldi.
Qazirgi ýaqytta tergeý amaldary júrgizilip jatyr. Olardyń nátıjeleri boıynsha túpkilikti protsessýaldyq sheshim qabyldanbaq.
Esterińizge salaıyq, osyǵan uqsas oqıǵa 11 shilde kúni Jambyl aýdany Baýman aýylynyń mańynda bolǵan edi.
Eldi meken turǵyny 65 jastaǵy er adam jıdek terip júrgen aýyldasy – 51 jastaǵy Altynaı Muzdaqbaevany abaısyzda atyp óltirdi degen kúdikke ilinip, qamaýǵa alyndy.
Oǵan QR Qylmystyq kodeksiniń 104-babynyń 1-bóligi «abaısyzda adam óltirý», 287-babynyń 3-bóligi «atys qarýyn, oq-dári, qarý-jaraqty nemese jarylǵysh zattardy zańsyz alyp júrý, ustaý, ótkizý» boıynsha aıyp taǵyldy.
Keıin QK 370-babynyń 4-bóligimen Jambyl aýdany Ozernoe aýylynyń jergilikti polıtsııa qyzmeti bólimshesiniń burynǵy ýchaskelik ınspektory ustalyp, ýaqytsha ustaý ızolıatoryna qamaldy.
