SQO-da alty aýdanda ǵana qoqysty bólek jınaý júzege asyrylady

PETROPAVL. QazAqparat – Soltústik Qazaqstan oblysynda turmystyq qatty qaldyqtardy túrine qaraı bólek jınaý ádetke aınalmaı tur. Qazirgi ýaqytta tek alty aýdanda ǵana shıkizat retinde qaıta paıdalanýǵa bolatyn qoqysqa arnaıy ydystar qoıylǵan, dep habarlaıdy QazAqparat tilshisi.

SQO boıynsha ekologııa departamentiniń málimetinshe, óńirdiń tek alty aýdan ortalyǵynda ǵana kásipkerler qoqysty suryptap, qaıta kádege jaratyp otyr. Olar Aıyrtaý, Aqqaıyń, Esil, Mamlıýt, Qyzyljar, Taıynsha aýdandary. Máselen, Qyzyljar aýdany Beskól aýylynda qatty turmystyq qaldyqtardy bólip jınaýǵa arnalǵan 24 konteıner bar.

Synaby bar qoldanylǵan lampalardy jınaýǵa 49 arnaıy ydys qoıylǵan, onyń 30-y Petropavlda tur.

Basqalarǵa Aıyrtaý aýdany Saýmalkól aýylynyń tájirıbesi úlgi. Munda turmystyq qatty qaldyqtardy suryptap jınaýǵa 85 konteıner jáne synaby bar lampalarǵa 5 konteıner qoıylǵan. Qazir munda eki kásipker makýlatýrany, tsellofandy, plastıkti, alıýmınıı bankalardy, tústi-qara metaldy, polıetılendi jáne shyny ydysty qaıtalama shıkizat retinde qabyldaıdy.

Taıynsha aýdanynda da turmystyq qatty qaldyqtardy bólek jınaýmen eki jeke kásipkerlik aınalysady.

Ekologtardyń aıtýynsha, tabıǵatty qorǵaý is-sharalary jospary jobasyna qaıtalama shıkizatty qabyldaý pýnktterin uıymdastyrý da kirgen.

Jalpy qazirgi ýaqytta turmystyq qatty qaldyqtardy ornalastyrý polıgondaryn salý boıynsha 8 aýdannyń qujattary daıyn. Osy maqsatqa 59 mln teńge jumsaldy. Olar aýdan ortalyqtarynyń jáne iri eldi mekenderdiń mańynda bolady. Alaıda olardyń jaqyn arada júzege asýy neǵaıbyl. Ǵ.Músirepov, Taıynsha, Ýálıhanov, Tımırıazev aýdandarynda qarjylandyrýdyń joqtyǵynan jumys toqtady.

Jambyl aýdanynda jobaǵa ózgeris engizilip jatyr.

Aqjar aýdanynda qorshaǵan ortaǵa áserdi baǵalaýdy ázirleý úshin «EKOTERRA KAZAHSTAN – 2010» JShS-men 1,7 mln teńgege shart jasaldy. Alaıda jumys oryndalmaǵandyqtan jergilikti ákimdikke sottasýǵa týra keldi. Jumsalǵan qarajat bıýdjetke qaıtaryldy.