SQO-da alty turǵyn esirtki bıznesimen aınalysyp kelgen

PETROPAVL. KAZINFORM — Soltústik Qazaqstan oblysynda uıymdasqan qylmystyq toptyń isi áshkere bolyp, úı jaǵdaıynda jumys istegen 9 fıto esirtki zerthanasy joıyldy.

Olar eldiń ońtústiginen ósimdik tektes esirtki jetkizýdi uıymdastyrǵan. Nátıjesinde 20 kg marıhýana tárkilendi. Bul týraly alǵashqy bes aıdy qorytyndylaǵan SQO polıtsııa departamenti bastyǵynyń birinshi orynbasary Asqar Muhametqalıev aıtty.

Osy aralyqta 139 esirtkige qatysty quqyq buzýshylyq tirkeldi, bul ótken jyldyń sáıkes kezeńimen salystyrǵanda 39-ǵa kóp. Onyń ishinde 87 qylmys anyqtaldy, onyń 66-sy satý faktileri, 5-i asa iri kólemde saqtaý, 3-i kontrabanda, 2-i esirtkini nasıhattaý jáne 2-i uıymdasqan qylmystyq topty qurý faktileri.

Zańsyz aınalymnan 40 keliden astam esirtki zattary tárkilendi. Olardyń ishinde 3,5 keliden astam sıntetıkalyq esirtki, 33 keli marıhýana, 3 keli qarasora, sondaı-aq gashısh, kannabıs shaıyry jáne tramadol bar.

— Taldaý barysynda SQO-ǵa sıntetıkalyq esirtkiler basqa óńirlerden, negizinen Astana, Almaty qalalarynan, Aqmola jáne Pavlodar oblystarynan «tasymaldaýshylar» arqyly jetkiziletini anyqtaldy. Qabyldanǵan sharalar nátıjesinde sıntetıkalyq esirtki jetkizýdiń 4 arnasy jabyldy. Mysaly, osy jyldyń 7 sáýirinde «Ońtústik» beketinde 26 jastaǵy er adam basqarǵan «Daewoo Nexia» kóligi toqtatyldy. Tintý barysynda shamamen 500 gramm sıntetıkalyq esirtki jáne 100 gramm kannabıs shaıyry tárkilendi. Kúdikti er adam respýblıkalyq ınternet-dúken úshin sıntetıkalyq esirtki tasymaldap kelgen. Qylmystyq is qozǵaldy, kúdikti qamaýǵa alyndy, — deıdi Asqar Muhametqalıev.

Buǵan deıin BQO-da esirtki zattaryn taratýmen aınalysqan qylmystyq top ustalǵanyn jazǵan edik.