SQO-da alkogoldik ónimderdi satýǵa tyıym salyndy
PETROPAVL. QazAqparat – Soltústik Qazaqstan oblysynda polıtsııa departamentiniń bastyǵy, óńir komendanty Marat Tólebaev tótenshe jaǵdaı rejımi jarııalanýyna baılanysty qandaı shekteýler engizilgenin aıtty, dep habarlaıdy QazAqparat tilshisi.
SQO polıtsııa departamentiniń bastyǵy, oblys komendaty Marat Tólebaev jergilikti telearna arqyly turǵyndarǵa úndeý jarııalady. Ol óńirde tótenshe jaǵdaı jarııalanýyna baılanysty birqatar shekteýler engizilgenin eskertip, turǵyndardy talaptardy qatań saqtaýǵa shaqyrdy. Óıtkeni, ony oryndamaǵandarǵa ákimshilik jáne qylmystyq jaýapkershilik qarastyrylǵan.
«5-19 qańtar aralyǵynda oblys aýmaǵynda tótenshe jaǵdaı rejımi jarııalandy. Túngi saǵat 23.00-den tańǵy saǵat 7.00-ge deıin komendattyq saǵat ornaıdy. Jeke tulǵalar men kólikterdiń qozǵalysyna shekteý qoıyldy. SQO-ǵa kirip-shyǵý shekteldi. Osy aralyqta sporttyq, buqaralyq, otbasylyq merekelik is-sharalardy ótkizýge tyıym salynǵan. Kóńil kóterý oryndarynyń jumysy shekteldi, alkogol ónimderin satýǵa tyıym salyndy. Sondaı-aq qarý-jaraq dúkenderi ýaqytsha jabyldy», - dedi Marat Tólebaev.
Oblys komendanty jeke basyn qaýip-qaterge tikpeý úshin turǵyndardy asa qajettilik bolmasa úıden shyqpaýǵa shaqyrdy.
«Sabyrlyq saqtap, arandatýshylyqqa boı bermeýge shaqyramyn. Tek qana resmı aqparatty negizge alýdy synamyn. Quqyq qorǵaý organdary tqrǵyndardyń qaýipsizdigi men tynyshtyǵy úshin barlyq sharany qoldanyp jatyr», - dedi Marat Tólebaev turǵyndarǵa arnaǵan úndeýinde.
