SQO-da alqabıler qylmystyq isti eki ret qarap, ekinshisinde qylmyskerlerge jaza kesildi
PETROPAVL. KAZINFORM – Soltústik Qazaqstan oblysynda buǵan deıin alqabıler aqtaǵan eki qylmyskerdiń isi qaıta qaraldy. Alqabılerdiń jańa quramy qaraqshylyq shabýyl jasaǵan, kisi óltirgen eki jasóspirimdi 12 jylǵa bas bostandyǵynan aıyrdy.
SQO sotynyń málimetinshe, búgin qylmystyq ister jónindegi mamandandyrylǵan aýdanaralyq soty alqabılerdiń qatysýymen I. jáne B.-ǵa qatysty qylmystyq is qaraldy. Jasóspirimderge qaraqshylyq shabýyl jasaý, qaraqshylyqpen ushtasqan kisi óltirý, urlyq jasaý aıyptary taǵylǵan.
Buǵan deıin 16 tamyzda SQO sotynyń qylmystyq ister jónindegi sot alqasy buǵan deıin alqabılerdiń qatysýymen sheshilgen aqtaý úkiminiń kúshin joıyp, qylmystyq isti sottyń ózge quramynda qaraýyna joldady.
Sottalǵandar I. men B. 2023 jyldyń 21 jeltoqsanynda SQO M. Jumabaev aýdanynyń Medvejka aýylynda bolyp, aldyn ala sóz baılasyp, aqsha urlaý maqsatynda M. degenniń úıiniń aýlasyna kirip, qaraqshylyq shabýyl kezinde ony óltirdi. Keıin olar úı ıesiniń 150 myń teńgesin qaltaǵa basqan.
2023 jyldyń aqpanynda I. ájesiniń úıinde bolǵan kezde onyń 2 mln teńge aqshasyn urlap ketken.
2024 jyldyń naýryz aıynda I. dosy L.-nyń úıinen onyń 69 myń teńgesin qoldy etken.
Prokýror qylmystar jıyntyǵy boıynsha sottalýshylarǵa 12 jylǵa bas bostandyǵynan aıyrý túrindegi túpkilikti jaza taǵaıyndaýdy surady.
Sottalýshylar men olardyń qorǵaýshylary aqtaý úkimin surady.
Nátıjesinde sot alqabılerdiń qatysýymen I. men B.-ni 12 jylǵa bas bostandyǵynan aıyrdy. Olar jazasyn qylmystyq-atqarý júıesiniń qaýipsizdigi ortasha kámeletke tolmaǵandardy ustaý mekemesinde óteıdi.
Úkim zańdy kúshine engen joq.
Buǵan deıin SQO prokýrorlary veterınarııalyq qaýipsizdik salasynda zań buzýshylyqtardy anyqtaǵanyn jazǵan edik.
