SQO-da alımentten jaltaratyn ata-ana balalaryna 320 mln teńge qaryz
SQO prokýratýrasynyń málimetinshe, óńirde qazirgi ýaqytta alıment alatyn 9289 bala jáne 22 qart tirkelgen. Alaıda olardyń arasynda zań boıynsha tıesili aqshany ala almaı júrgender de bar. Óz balasyn ózeginen tepken 291 adam bolsa, sonyń 11-i – áıel. Bular qasaqana alıment tóleıtinderdiń qatarynda, olardyń jalpy boryshy 320 mln teńgeden asty.
«Prokýratýra organdarynyń quzyryna kámeletke tolmaǵan balalardyń quqyǵy men múddelerin qorǵaý kiredi. QR Konstıtýtsııasynyń 27-babyna sáıkes balalaryna qamqorlyq jasaý árbir ata-ananyń mindeti. Biraq olardyń arasynda óz mindettemelerin tıisti túrde oryndamaıtyndar da bar. Sondyqtan jaýapty vedomstvolarmen birge jumys istep, bul máseleni baqylaýda ustaımyz», - deıdi SQO prokýratýrasy basqarmasynyń prokýrory Marat Qazıev.
Jyl bastalǵaly óńirde 85 boryshker ákimshilik jazaǵa tartyldy. Mindetin oryndaýdan qashqan taǵy 6 adam qamaýǵa alyndy.
Qazirgi ýaqytta alıment tóleýden jaltaryp júrgen 44 adamnyń júrgen jeri belgisiz, olarǵa izdeý jarııalandy. Osyndaı sharanyń nátıjesinde taǵy 11-iniń turǵylyqty jeri anyqtaldy.
«Atqarýshylyq óndiriste mańyzdy jumystardyń biri – memleket paıdasyna óndirip alý. Osylaısha sot oryndaýshylary bıýdjetti 1,3 mlrd teńgege toltyrdy. Áli 8,5 mlrd teńgeni óndirip alý boıynsha jumys atqarylyp jatyr. Al óz jumysyna salǵyrt qarap, jaýapsyzdyq tanytqan 69 sot oryndaýshysy tártiptik jaýapkershilikke tartyldy», - deıdi Marat Qazıev.
