SQO-da alıment tóleýden jaltarǵan 14 azamat qylmystyq jaýapkershilikke tartyldy

Soltústik Qazaqstan oblysynda alıment tóleýden jaltaryp júrgen 160 adam bar, olardyń jalpy qaryzy 250 mln teńgege jýyqtaǵan, dep habarlaıdy Kazinform.

SQO prokýratýrasynyń málimetinshe, alıment tólemderin óndirip alý jáne alımentti qasaqana tólemeıtin boryshkerlerdi Qylmystyq kodekstiń 139-baby boıynsha qylmystyq jaýapkershilikke tartý máseleleri jóninde vedomstvoaralyq keńes ótti. Jıynǵa qadaǵalaýshy organ ókilderinen bólek sot oryndaýshylary men tergeýshiler qatysyp, ózara is-qımyldy talqylady. 

Іs-sharada sot oryndaýshylardyń usynystardy daıyndaý sapasy, olardy engizýdiń negizdiligi jáne qylmystyq ister boıynsha tergeýshiler qabyldaǵan protsessýaldyq sheshimderiniń zańdylyǵy máseleleri talqylandy. 

Óńirde bul másele ózekti. Qazirgi ýaqytta SQO-da qasaqana alıment tólemeı júrgen 160 adam bar. Olardyń jalpy qaryzy - 246,9 mln teńge. Boryshkerlerdiń 14-i qylmystyq jaýapkershilikke tartylyp, 11 qylmystyq is boıynsha sotqa deıingi tergep-tekserý júrgizilýde. 

Prokýrorlar buǵan deıin toqtatylǵan 55 qylmystyq istiń zańdylyǵyn qarap, nátıjesinde 4 qylmystyq is boıynsha zańsyz protsestik sheshim joıyldy. Qylmystyq kodekstiń 139-baby boıynsha boryshkerlerdi qylmystyq jaýapkershilikke tartý týraly usynystardy durys jibermegeni úshin 5 sot oryndaýshysy ártúrli tártiptik jaýapkershilikke tartyldy. 

Talqylaý nátıjesi boıynsha sot aktilerin oryndaýǵa, memlekettik jáne ýákiletti organdardyń ózara is-qımylyn arttyrýǵa, onyń ishinde Qazaqstan Respýblıkasy Qylmystyq kodeksiniń 139-baby boıynsha qasaqana alıment tólemeýshilerdi jazaǵa tartýǵa baǵyttalǵan birlesken is-sharalar ázirlendi, vedomstvoaralyq jumys toby quryldy.