SQO-da alıment tóleýden qashyp júrgen 31 adam qamaýǵa alyndy

PETROPAVL. QazAqparat – Soltústik Qazaqstan oblysynda balasyna alıment tóleýden jaltaryp júrgen 151 adam bar, olardyń jalpy qaryzy 175,4 mln teńgege jetti, dep habarlaıdy QazAqparat tilshisi.

SQO prokýratýrasynyń málimetinshe, alıment boıynsha qaryz atqarylyp jatqan jumystardyń nátıjesinde azaıyp keledi.

Máselen, 2021 jyly jalpy bereshek 1,1 mlrd teńgege jetken. Byltyr alıment tóleýshiler 261,2 mln teńge qaryz bolsa, búginde ol 175,4 mln teńgege deıin azaıdy.

Sonyń ishinde bir adamnyń balalaryna qaryzy 5 mln teńgege jetken.

«Memlekettik organdar jumyssyz júrgen boryshkerlerdi eńbekpen qamtý úshin barlyq sharalardy qabyldaýy kerek. Biraq óz balalaryna qasaqana alıment tólemeıtin jáne tóleýden bas tartqandarǵa qylmystyq jaýapkershilik bar ekenin eske salamyz. Tek bıyldyń ózinde 56 boryshker ákimshilik jaýapkershilikke tartyldy, onyń 31-ne qamaýǵa alý sharasy qoldanylsa, 25-ine aıyppul salyndy. 4 qasaqana alıment tólemeýshi qylmystyq jaýakershilikke tartyldy. Balalar bizdiń qoǵamnyń osal jáne qorǵalmaǵan bóligi bolǵandyqtan, olardyń quqyqtaryn saqtaý boıynsha jumys erekshe baqylaýda jáne barlyq memlekettik jáne ókiletti organdardyń ózara tıimdi árekettesýi qajet», - deıdi óńir prokýrorlary.

Qazirgi ýaqytta SQO-da 8 myńnan astam kámeletke tolmaǵan bala alıment alýshy esebinde tur.

Al alıment tóleýshiler sany – 7118.