SQO-da alıment tólemegen boryshker Germanııadan tabyldy
PETROPAVL. QazAqparat – Soltústik Qazaqstan oblysynda kóshi-qon qyzmeti «Boryshker» jedel-profılaktıkalyq is-sharasyn ótkizip, izdeýdegi 16 adamnyń júrgen jerin anyqtady, dep habarlaıdy QazAqparat tilshisi.
SQO polıtsııa departamenti baspasóz qyzmetiniń málimetinshe, oblys boıynsha alıment tólemeı júrgen 21 adam, 29 boryshker jáne týystyq baılanys úzilgen 19 adam izdestirilip jatyr.
17-19 aqpan aralyǵynda ótip jatqan «Boryshker» jedel-profılaktıkalyq is-sharasy aıasynda bul jumystarǵa kóshi-qon qyzmetinen bólek polıtsııanyń basqa bólimsheleri de jumyldyryldy.
Taıynsha aýdandyq polıtsııa bólimine jergilikti turǵyn kelip, 52 jastaǵy aǵasynan qyrkúıekten beri habardyń joqtyǵyn aıtqan.
Ol tabys tabýǵa ketip, baılanysqa shyqpaı qoıypty. Polıtseıler eki kúnniń ishinde onyń júrgen jerin anyqtady.
Er adam elordalyq sharýashylyqtardyń birinde túrli jumystardy atqaryp kelgen eken.
«Boryshkerler shetelge shyǵyp ketken jaǵdaıda olardyń júrgen jerin anyqtaý qıyn. Máselen osyndaı boryshkerlerdiń biri Germanııaǵa shyǵyp ketken. Kóshi-qon qyzmeti onymen telefon arqyly habarlasyp, jaǵdaıdy túsindirdi. Óıtkeni sottyń sheshimimen ol alıment boıynsha boryshker. Endi resmı organdar onyń júrgen jerin rastaǵannan keıin isi sot oryndaýshylaryna beriledi», - deıdi SQO PD kóshi-qon qyzmeti basqarmasynyń bastyǵy Talǵat Ábilev.
«Boryshker» operatsııasynyń eki kúninde týystyq baılanys úzilgen 3 adamnyń, alıment tólemeı júrgen 3 adamnyń jáne 12 boryshkerdiń júrgen jeri anyqtaldy.
