SQO-da alıment tólemegen 40-qa jýyq adam qamaýǵa alynǵan
PETROPAVL. QazAqparat – Soltústik Qazaqstan oblysynda 270 adamnyń alıment boıynsha qaryzy 43 mln teńgege jetken, dep habarlaıdy QazAqparat tilshisi.
Elimizde árbir úshinshi otbasy ajyrassa, SQO-da árbir ekinshi úıelmenniń shańyraǵy ortasyna túsedi. Jeke sot oryndaýshylary óńirlik palatasynyń málimetinshe, olardyń qolynda búginde alıment óndirý boıynsha 7 myńnan astam atqarý qujaty bar. Alaıda alıment tóleýi tıis azamattardyń keıbiriperzentiniń aldyndaǵy mindetin oryndaýǵa asyqpaıdy eken.
«Búginde 270 adam «problemalyq alıment tóleýshi» dep anyqtalǵan. Bereshekti óndirip alý boıynsha tıisti is-sharalar júrgizilip jatyr. Dúnıe-múlkine, esepshottaryna, elden shyǵýyna shekteý qoıylǵan. Olardyń júrgizý kýálikteriniń de kúshi joıylǵan. Mundaı alıment tóleýshilerge izdeý jarııalaımyz», - deıdi SQO boıynsha jeke sot oryndaýshylar óńirlik palatasynyń basshysy Asan Matkarımov.
Mamandardyń aıtýynsha, 270 adamnyń 123-i úsh aı kóleminde bereshek. Al qalǵan 143-i múlde alıment tólemegen. Saldarynan qordalanǵan qaryz 43 mln teńgege jetken.
SQO Ádilet departamentiniń málimetine sensek, týǵan balasyna kómektesýden qashqaqtap júrgen ákelerdiń 87-si ákimshilik jaýapkershilikke tartylǵan. Onyń 48-i aıyppul tólese, qalǵan 39-y jazasyn qamaýda ótedi.
Budan basqa taǵy 249 adamnyń isi ishki ister organdaryna qylmystyq jaýapkershilikke tartý maqsatynda jiberilgen.
