SQO-da alıment boıynsha qaryzy bar 29 boryshker qamaýǵa alyndy
SQO ádilet departamentiniń málimetinshe, óńirde 6 165 adam alıment tóleıdi. Olardyń 3 800-i óz mindetin júıeli túrde oryndaıdy.
«Alıment tólemeýshilerge zań aıasynda túrli sharalar qoldanylady. Alaıda, bul kóp jaǵdaıda oń nátıje bermeıdi. Olar óz tarapynan bizdiń shekteýimizben kelispeı, túrli organdarǵa shaǵymdanyp jatady.
Notarıaldyq is-áreketterge, boryshkerdiń múlkine, ekinshi deńgeıdegi bankterdegi shottarǵa shekteý qoıylady. Qazaqstannan tys jerlerge shyǵa almaıdy. Sondaı-aq, izdeý salynady. Mundaı sharalarǵa qaramastan qaryzdaryn áli kúnge deıin ótemeı júrgender bar», - deıdi SQO ádilet departamentiniń bólim basshysy Aqlıma Bekenova.
Óńirde byltyr alıment tóleýden qashyp júrgen boryshkerlerdiń sany 771 bolsa, bıyl 243 adamǵa deıin azaıǵan. Balasynan múldem bezip, jyldap aqsha tólemeıtinderdiń bereshegi de 1 mlrd teńgeden 400 mln teńgege deıin kemigen.
Aqlıma Bekenovanyń aıtýynsha, zań boıynsha boryshkerlerdi kóligin basqarý quqyǵynan aıyrýǵa bolady. Bıyl osylaısha 73 boryshker ýaqytsha júrgizýshi kýáliginen aıyryldy. 68 boryshker ákimshilik jaýapkershilikke tartyldy. Onyń 29-y qamaýǵa alynsa, 39-yna aıyppul salyndy. 149 adamnyń isi qylmystyq is qozǵaý úshin ishki ister organdaryna jiberildi. Alaıda onyń 45-i ǵana Sotqa deıingi tergep-tekserýlerdiń biryńǵaı tizilimine engizildi. 16 qylmystyq is taraptardyń mámilege kelýine baılanysty toqtatylsa, 3 boryshker sottaldy.
Al jumyssyz júrgenderdiń balalaryna alıment tóleýge múmkindigi bolýy úshin sot oryndaýshylarynyń óńirlik palatasy qalalyq jáne aýdandyq jumyspen qamtý bólimderimen birge «Bos oryndar jármeńkesin» toqsan saıyn ótkizip turady. Oǵan 23 boryshker qatysyp, 6-ýy jumysqa ornalasty.
