SQO-da alıment boıynsha qaryz 295 mln teńgege jetken
PETROPAVL. QazAqparat – Soltústik Qazaqstan oblysynda 200-ge jýyq boryshker alıment tóleýden qashyp júr. Olardyń ortaq qaryzy 295 mln teńge shamasynda, dep habarlaıdy QazAqparat tilshisi.
SQO jeke sot oryndaýshylar palatasynyń basshysy Asan Matkárimovtiń aıtýynsha, óńirde 6 350 alıment tóleýshi bar. Olardyń 3 800-den astam boıynsha másele joq, mindetterin júıeli túrde oryndaıdy. Al alıment tóleýden jaltaryp júrgenderdiń sany – 197. Olardyń ortaq bereshegi 295 mln teńgege jýyqtaǵan.
«Olar bir ret te alıment tólemegen. Boryshkerlerden óndirip alý boıynsha jumystar júrgizilip jatyr. Olardyń múlikterine tyıym salyndy. Qazaqstannan shetelge shyǵýǵa, bank esepshottaryna tyıym salyndy. Júrgizý kýálikteri nemese basqa da lıtsenzııalary bolatyn bolsa, sot arqyly olar toqtatylady. Jalpy boryshkerlerdiń barlyǵy búgingi tańda ákimshilik jáne qylmystyq jaýapkershilikke tartyldy», - deıdi Asan Matkárimov.
Byltyr óńirde 161 boryshker ákimshilik jaýapkershilikke tartylǵan. Olardyń 71-i qamaýǵa alynsa, 89-yna aıyppul salyndy. 12 qylmystyq is sotqa jiberildi. 9 boryshker QR Qylmystyq Kodeksiniń 139-baby boıynsha sottaldy. Taǵy 2 adamnyń isi qaralyp jatyr. Sondaı-aq, 21 qylmystyq is taraptardyń mámilege kelýine baılanysty toqtatylǵan.
«Eger boryshker 3 aı qatarynan óz mindetin oryndamasa shara qoldanamyz. Jeke sot oryndaýshylary qaýly shyǵaryp, tanysýǵa 3 kún beredi. Eger nátıje shyǵarmasa, shekteýler qoıamyz. Polıtsııamen, mıgratsııalyq qyzmetpen birge jumys isteımiz. Olar boryshkerlerdi tabýǵa kómektesedi», - deıdi SQO jeke sot oryndaýshylar palatasynyń basshysy Asan Matkárimov.
