SQO-da alıment bereshegi 846 mln teńgege jetti
PETROPAVL. KAZINFORM – Soltústik Qazaqstan oblysynda alıment boıynsha bereshek mólsheri bir jylda 300 mln teńgege ósti.
Jeke sot oryndaýshylarynyń polıtsııa qyzmetkerlerimen birlesken reıdi barysynda alıment boıynsha iri mólsherde qaryzy bar er adam toqtatyldy. Kóligi birden aıyp turaǵyna jóneltildi. Nátıjesinde boryshker nebári bir saǵat ishinde bir mln teńge qaryzyn tolyq ótep, balalaryna bereshekten qutyldy.
SQO jeke sot oryndaýshylarynyń óńirlik palatasynyń málimetinshe, qazir óńirdegi alıment tóleýshilerdiń jalpy qaryzy 846 mln teńgege jetken.
Al alıment tóleýden jaltaryp júrgen boryshkerlerdiń sany búginde 500-den asqan. Olar belgilengen tólemderdi múldem tólemeıdi.
Mamandar bereshektiń artýyna birneshe faktor áser etip otyrǵanyn atap ótti.
Negizgisi - óńirde ajyrasýlar sanynyń artýy. Buǵan qosa, Qazaqstandaǵy ortasha aılyq jalaqynyń ósýi de bereshek mólsheriniń ósýine yqpal etedi. Sebebi alıment boıynsha qaryz jumys istemeıtin nemese tabysyn rastamaǵan boryshkerlerge eseptelgen kezde eldegi ortasha aılyq jalaqy mólsheri negizge alynady.
Desek te, sot oryndaýshylary osy jyldyń segiz aıynda alıment boıynsha 205 mln teńge qaryzdy óndirip alǵan.
- Alıment tóleýden jaltarǵandarǵa qatysty sharalar da kúsheıtildi. Jyl basynan beri jeti boryshker Qazaqstan Respýblıkasy Qylmystyq kodeksiniń 139-baby «balalardy nemese eńbekke qabiletsiz ata-analar men jubaıyn kútip-baǵýǵa arnalǵan qarajatty (alımentti) tóleý jónindegi mindetterdi oryndamaýdan jaltarý» boıynsha sottaldy, - deıdi jeke sot oryndaýshylar.
SQO-da atqarýshylyq is júrgizý organdarynyń avtomattandyrylǵan aqparattyq júıesiniń derekterine sáıkes, ata-analaryn asyraýǵa alıment óndirip alý boıynsha 10 atqarýshylyq is júrgizý bar. Bul ister boıynsha qazirgi tańda bereshek joq.
Buǵan deıin alıment boıynsha bereshegi 5 mln teńgeden asqan baıqońyrlyq qamaýǵa alynǵanyn jazǵan edik.
