SQO-da Alık Shpekbaev Biryńǵaı azamattardy qabyldaý kúnine qatysty

PETROPAVL. QazAqparat – Soltústik Qazaqstan oblysynda Biryńǵaı azamattardy qabyldaý kúninde 500-den astam adamnyń ótinish-máselesi qaraldy. Respýblıkalyq is-sharaǵa SQO-da jumys saparymen júrgen Sybaılas jemqorlyqqa qarsy is-qımyl agenttiginiń tóraǵasy Alık Shpekbaev qatysty, dep habarlaıdy QazAqparat tilshisi.

Memleket basshysy Qasym-Jomart Toqaevtyń «Estıtin memleket» tujyrymdamasynda belgilegen mindetterdi oryndaý maqsatynda «Biryńǵaı azamattardy qabyldaý kúni» jalpyrespýblıkalyq is-sharasy aıasynda Alık Shpekbaev Petropavlda azamattardy jeke suraqtarymen qabyldady.

SQO-nyń jas kásipkeri Tımýr Júsipov aýyl sharýashylyǵy taýar óndirýshilerine sýbsıdııa berý máselesin qozǵasa, «Jaqsy tuz Petropavl» JShS jetekshisi Erik Ázenov jer qatynastary salasyna qatysty suraqty kóterdi.

Budan basqa, Agenttik tóraǵasyna soltústikqazaqstandyqtar turǵyn úı kommýnaldyq sharýashylyǵy salasyna qatysty, áleýmettik qamtý boıynsha da suraqtar qoıdy.

«Barlyq ótinishter meniń jeke baqylaýymda bolady. Ár saýaldy jeke-dara zerdelep, máseleni sheshý boıynsha jergilikti departamentke naqty tapsyrma berildi», – dedi Alık Shpekbaev.

Sondaı-aq, qabyldaýǵa kelgen azamattar «Qyzyljar – adaldyq alańy» jobalyq keńsesiniń jáne «Bıznes pen ınvestıtsııany qorǵaý» jobasynyń jumysy týraly aıtyp, oń baǵalaryn berdi.

Aıta ketken jón, búgin el aýmaǵynda turǵyndarmen tikeleı qarym-qatynasty nyǵaıtyp, senimin arttyryp, áleýmettik suraqtaryn sheshýge baǵyttalǵan jalpyrespýblıkalaq Biryńǵaı azamattardy qabyldaý kúni ótip jatyr. SQO-da is-sharaǵa 500-den astam turǵyn óz ótinishimen keldi.