SQO-da alǵashqy aýylǵa kógildir otyn keldi
Vozvyshenka - SQO-da gazdandyrylǵan ázirshe alǵashqy eldi meken. Bul bastama «Vozvyshenka SK» JShS dırektory Abdýrahım Noqaevtyń qarjylandyrýynyń arqasynda júzege asty. Pılottyq jobaǵa kásipker 200 mln teńge jumsaǵan.
«Gaz eldi mekenge ákelinedi. Kásipker aýyl shetine úlken gaz saqtaıtyn rezervýar ornatyp, sodan aýylǵa qubyr tartty. Endi turǵyndar kógildir otynmen baspanany jylytady, as-sý ázirleıdi. Sý qubyry da tartyldy. Bul aýyl turǵyndarynyń, ásirese, zeınetkerlerdiń turmys jaǵdaıyn jaqsartýǵa sep boldy», - deıdi Vozvyshenka aýyldyq okrýgi ákiminiń mindetin atqarýshy Murat Osmanov.
Oblys ortalyǵynan shalǵaı jatqan Vozvyshenka eldi mekeninde qazir júzden astam úı bar. Olardyń 40 gazben qamtamasyz etildi. Kógildir otyn negizinen zeınetkerlerdiń, áleýmettik sala qyzmetkerleriniń, seriktestik jumysshylarynyń úılerine qosyldy.
«Baspanalarǵa Ońtústik Koreıa gaz qondyrǵysy ornatyldy. Ázirshe, qanshalyqty tıimdi ekenin aıtý qıyn. Bir aı ótkende belgili bolady. Basqa turǵyndar áliptiń artyn baǵyp otyr. Óıtkeni bizdiń óńirde aýyldarda úılerdi gazben jylytqan emes. Eger jaqsy nátıje berip jatsa, eldi mekenniń qalǵan turǵyndary da gazdandyrý júıesine qosylmaq», - deıdi Murat Osmanov.
Eldi mekendegi «Vozvyshenka SK» JShS negizinen asyl tuqymdy mal ósirýmen aınalysady. Kásipker jaqynda demalys ortalyǵyn paıdalanýǵa berdi. Bul halyqqa bos ýaqytyn ózine jáne qoǵamǵa paıdaly ótkizýge jáne túrli formattaǵy is-sharalardy uıymdastyrýǵa múmkindik bermek. Jaqynda eldi mekende Táýelsizdik alańy ashylyp, 150 oryndyq dámhananyń qurylysy bastalady dep josparlanǵan.
