SQO-da alǵashqy qar jaýdy
PETROPAVL. KAZINFORM – Soltústik Qazaqstan oblysynda kún raıy kúrt sýytyp, keı aýdanda búgin túnde qar jaýdy.
Áleýmettik jelilerde qys mezgiliniń alǵashqy belgileri beınelengen kadrlar tarap jatyr. Mamlıýt aýdany Novomıhaılovka aýylynyń turǵyny túnde jaýǵan alǵashqy qardy beınejazbaǵa túsirip, jeli qoldanýshylarymen bólisti.
«Qazgıdromet» kásiporny oblystyq fılıalynyń málimetinshe, óńirde aýa raıynyń qolaısyzdyǵy áli de saqtalady. Sınoptıkterdiń boljamyna sáıkes, 5 qazan kúni oblystyń batysy men soltústiginde qar aralas jańbyr jaýyp, jaıaý burqasyn men kóktaıǵaq bolýy múmkin.
Petropavlda da qar aralas jańbyr jaýmaq. Joldarda kóktaıǵaq qalyptasýy múmkin.
Buǵan deıin Qazaqstannyń 16 oblysynda jaýyn-shashyn, tuman, kóktaıǵaq, burqasyn jáne ekpini 28 m/s-qa deıin jetetin jel bolatyny boljanyp, aýa raıyna qatysty eskertý jarııalanǵanyn jazǵan edik.
